«Гел янәшәбездә бул» – Диана Сәфәрованың улы, теләкләр теләп, әтисенә чишмә суы эчерә

Авариягә эләгеп һәлак булган блогер Диана Сәфәрованың улы Сәид, матур теләкләр теләп, әтисенә чишмә суы эчергән.

Әбисе аны нинди теләкләр теләргә икәнен өйрәтеп тора. «Син һәрвакыт янәшәбездә бул, чөнки син – безнең әтиебез. Без сине бик яратабыз. Сәламәт, көчле бул. Син безгә бик кирәк. Бисмилләхир-рахманир-рахим, Аллаһу әкбәр», – дип әйттерә ул аңа.

Видеоны «Язмышлар» сәхифәсенә куйганнар. «Сабыйлар сау-сәламәт булсын. Әбиләре, әтиләре аларга зур терәк. Әниләре сөенеп ятсын», – дип язганнар анда.

Диана Сәфәрова быел җәй башында юл һәлакәтенә эләгеп һәлак булды. Аның 5әр яшьлек игезәк уллары һәм 8 яшьлек кызы калды. Бүгенге көндә сабыйларны әбиләре белән бабалары һәм әтиләре тәрбияли.