Фирдүс Тямаев трассада бәрдергән мәчесен тапкан
«Киләсе кара пиарга кадәр», — дип саубуллаша җырчы песи белән.
![Фирдүс Тямаев трассада бәрдергән мәчесен тапкан](https://intertat.tatar/resize/shd/images/uploads/news/2020/10/9/bdeaa95c2bd55d9fa0348ce338bf860d440b211a78ca280b65566df3ea63.jpg)
Фирдүс Тямаев үзенең Инстаграмында аклы-сарылы мәче белән видео куйган. «Таптым мин аны ниһаять», — дип язган. «Теге вакытта нахакка песи үтердең диделәр. Менә исән бит», — ди ул видеода.
2019 елның азагында Фирдүс Тямаев һәм Гүзәл Уразоваларның юлда яткан мәче үләксәсе турында төрттерүле-көлкеле сөйләшүе язылган видеолары матбугат чараларын, телеграм каналларны айкады. Бу зур гауга чыгарды. Гүзәл Уразова шул урынга яңадан килеп, алар көлгән предметның үләксә түгел, чүпрәк булуын әйткән иде. Фирдүс Тямаев белән Гүзәл Уразованы, җәзага тартуны сорап, имза җыя да башладылар.
Төркемдәшләре видеоны Куклачевка җибәрергә тәкъдим итә, чөнки ул да Тямаевны хайваннарда җәберләүдә гаепләгән булган. Фирдүс Тямаев белән Гүзәл Уразованы хайван үләксәсеннән көлүдә гаепләгәннәр иде.
Тямаев песи белән: «Киләсе кара пиарга кадәр», — дип саубуллаша.
«Эй, күптән түгел Гүзәлне шашлыкка чакыра идегез, бик таза күренә», — дип язган бер инстачы. «Бәхетле мәче», — дип язучылар да бар.