Федераль эзләүдәге Илүсә Фәлахова бергә турлар саткан дус кызлары турында: «Аралашмыйбыз»
Дубайга арзан бәядән юлламалар сатып туристларны алдаган, хәзер федераль эзләүдә булган блогер Илүсә Фәлахова-Миңнегалиева чит илдә бергә яшәгән дус кызлары турындагы сорауга җавап биргән.
«Сезнең дус кызларыгыз кая? Сез аерым яшисезме? Без нәрсәнедер белми калдыкмы?» – дип сораган блогерны карап баручыларның берсе.
«Без аерылып чыгып киткәнгә дүртенче ай китте. Алар белән аралашмыйбыз», – дип җавап биргән ул.
Илүсә ире Рушан һәм улы Алим белән аерым бер фатирда яшәве турында алдан да хәбәр иткән иде.
«Утка-суга керерлек дусларым бар. Шуңа күрә минем бер тамчы шигем дә юк, борчылмыйм да. Дубайга безнең белән 20 кеше күченә», – дип саубуллашып киткән иде алар.
