Фәнис Хөсәенов истәлегенә шигырь: «Әни җаным, кичер, йөрәгеңә, уйламыйча, утлар кададым»
Вафатына ярты елдан артык вакыт узса да, Башкортстан егете, махсус операциядә каршы як БТРын куып китеп танылган Фәнис Хөсәенов исеме онытылмый. Халык Фәнис хөрмәтенә әледән-әле яңа шигырьләр иҗат итә, герой исемендәге рәсми төркемдә язып, әнисенең, туганнарының хәлләрен белешеп тора.
Фәниснең якты истәлегенә язылган шигырьләрнең берсе:
Соңгы уйланулар
Балачагым үтте шуклык белән,
Бәхет йолдызларын эзләдем.
Кирәгеннән артык кыю булдым,
Башкачарак күрде күзләрем.
Яндым-көйдем яшәү дәрте белән,
Борчу-хәсрәт булды юлымда.
Әкияттәй матур тормыш кору
Хыял булып калды уемда.
Канатланып киттем, язмышымны
Үзгәртәм дип, якты тормышка.
Тик белмәдем, язмыш җиле мине
Калдырасын утлы борылышта.
Әни җаным, кичер... йөрәгеңә
Уйламыйча утлар кададым.
Чарасыздан кылган эшләремнең
Хаталарын бик соң аңладым...
Туган илне, таныш иптәшләрем,
Саклар өчен кердем утларга...
Сезне аңлап, ярдәм кулын сузган,
Чын күңелдән, рәхмәт дусларга.
Кире кайтып булса үткәннәргә,
Белер идем ничек яшәргә.
Кыюлыгым, акыл белән җигеп,
Юл күрсәтер идем яшьләргә.
Туган якка кайтты Герой исемем,
Үзем генә кайта алмадым...
Якты дөньяларда яшәү бәхетен,
Тик соңырак кына аңладым...
Китеп бардым, ил батыры булып,
Хыялларны утта яндырып...
Минем юлым балам дәвам итәр,
Бар кешене таңга калдырып.
Люция Бикмуллина