Еллар буена укымый калдырган намазны ничек төзәтергә?
Хәзрәт дәфтәр ачарга һәм укыган намазларны язып барырга киңәш итә.
Кеше еллар буена намаз укымыйча йөрсә дә, аны барыбер укырга кирәк. Бу турыда Казанның «Гаилә» мәчете имам-хатыйбы Рөстәм хәзрәт Хәйруллин аңлата.
Укылмый калган намазлар күп булмаганда, аз гына буш вакыт килеп чыгуга аларны яңартырга кирәк. «Төрле хәл булырга мөмкин. Һәр намазның үз вакыты бар. Аллаһы Тәгалә һәр намазга озын вакыт биргән, шушы вакыт эчендә аны укыр өчен ике минут табарга була», — ди хәзрәт.
Кешенең еллар буе укылмый калган намазлары булса, аңа махсус дәфтәр ачарга киңәш ителә.
«Дәфтәр ачыгыз. Шунда язып барыгыз. Фарыз намазларны гына укырга кирәк. Көн саен бишәрләп булса да укып барып, бер ай эчендә дә шактый күп укырга була. Аллаһы Тәгалә сезгә мөмкинлек һәм көч бирсен», — ди хәзрәт.
