Дубайга күченгән блогер Илүсә Фәләхованың әти-әнисе, туганнары белән аралары суынган
Дубайга күчеп киткән блогер Илүсә Фәләхованың әти-әнисе, туганнары белән аралары суынган. Бу хакта ул социаль челтәрдәге битендә хәбәр итә.
«Моның сәбәпләре күп. Көнчелек тә бар. «Мин кар көртләрендә, сарайда йөрим, ә син кояшта кызынасың» дигән кебегрәк. Әти-әни турында әлегә берни дә әйтми торам. Әмма хәзер без бик аралашмыйбыз. Безнең сөйләшүләр талаш белән тәмамлана. Сәбәбе – әни минем дусларымны күралмый», – дип язган ул.
Блогер Дубайга китү карарын ата-аналары хупламавы турында хәбәр иткән иде, бәлки, ана кеше баласының бу адымга баруында аның дусларын гаеплидер. Чөнки Илүсә Дубайга ире һәм дуслары – барысы бергә 8 кеше киткән иде. Аларга соңрак тагын кечкенә балалы 2 гаилә килеп кушылды.
Блогер Илүсә Фәләхова ире һәм дуслары белән Дубайга күченгән.
Блогер энесе Русланга да (Илүсәнең әти-әнисе кечкенәдән тәрбиягә алган энесе) үпкәләгән. Руслан белән сөйгәненең никахы булган. Алар бу хакта Дубайда яшәүче апасы белән җизнәсенә хәбәр итеп тормаган. Яшьләрнең хисләрдән башы чуалганмы, әллә инде «барыбер кайтмаячак» дипме, бу куанычлы хәл белән апасы белән уртаклашуны кирәк санамаган.
«Үз гомеремне бирергә әзер кешеләр менә шулай эшләде. Аларның никахлары булды. Бу хакта без очраклы гына белдек. Әлбәттә, безне беркем дә чакырмады», – дип язган блогер энесенең никахы турында.
Ул бу хакта Русланның үзенә дә сорап язган, әмма ул апасының «Минем бер генә соравым бар. Нигә без никахка чакыру алмадык?» дигән соравына җавап биреп тормаган.
«Менә иң ачы дөреслек: син туганнарыңа да кирәк түгел», – дип нәтиҗә ясаган блогер.
