Әдилә Сәфәрова: «Кеше башына берәр кайгы төшсә, башкалар сөенә»
Алып баручы, журналист Әдилә Сәфәрова үзенең Инстаграм сәхифәсендә намус турында фәлсәфи фикерен язган.
«Намус. Һәркем төрлечә аңлый. Бу төшенчә югалып та бара кебек. Бүгенге җәмгыятьтә бер-береңне алдау, урлашу, кеше хакына керү нормаль күренешкә әйләнеп бара.
Дин безне ничек өйрәтә? Аллаһтан куркырга, кешеләрдән оялырга. Кешеләрдән оялабызмы соң? Оялу төшенчәсе бармы хәзер?
Кеше өлеше дип тормыйбыз, үзебезгә күбрәк умырырга тырышабыз. Кеше ярлары дип тормыйбыз, үзебезнеке итәргә тырышабыз. Эшнең остасымы син юкмы, шул эшкә алынасың. Ә кеше сиңа ышанып тапшыра. Дөресме шулай?
Намус төшенчәсе югалган бу чорда кешегә карата хөрмәт тә кими, кешедән оялу, кеше хакын санлау бетә. Кешегә карата мәрхәмәтлелек азая. Йөрәкләр таш бәгырьлегә әверелә. Кеше башына берәр кайгы төшсә, башкалар сөенә. Ярдәм кулы сузасы урынга. Замана алда бар ди, кеше башларын таптап алга чап ди.
Пәйгамбәребез (с.г.с.) хәдисләрендә ничек өйрәтә безне? Изге эшләрдә ярышыгыз, ди. Ә хәзер кешеләр байлыкта ярыша. Мөмкинлеге бармы-юкмы, күршесен уздырырга тырыша. Уздырып та, бәхет табамы? Күңеле, җаны тынычлык аламы?», — дип язган ул.