Дәүләт Думасы депутаты ни өчен Африкадан кара тәнле кешеләрне кертәчәкләрен аңлатты

Кичә Кения түрәсе Россиягә 10 мең кешене эшләргә җибәрәчәген әйткән иде. Бүген Россия Дәүләт Думасының хезмәт, социаль сәясәт һәм ветеран эшләре комитеты рәисе Ярослав Нилов бу хәбәрнең дөрес булуын раслады, дип яза NEWS.ru.

Ярослав Нилов фикеренчә, 10 мең африканлы – «гомуми миграцион агымда» зур сан түгел.

«Без үзенчәлекле вазгыятьтә – бездә эшсезлек түбән дәрәҗәдә, безгә эшчеләр дә кирәк. Барыннан да бигрәк хезмәт күрсәтүдә, туклану өлкәсендә, авыл хуҗалыгында, төзелештә. Кениялеләр, мөгаен, шул өлкәдә кулланылыш табар», – дигән депутат.

Нилов фикеренчә, африкалыларны кайда эшләтү эш бирүчеләрнең теләкләренә бәйле. Кениянең Россиягә эшчеләрне җибәрүе – Россиянең Африка илләре белән хезмәттәшлеге нәтиҗәсе, дигән ул.

«СССРда, шулай ук хәзер дә, чит ил студентларының бик күбесе Россиядә укыды. Африка белән безнең принципиаль яңа төрле мөнәсәбәтләр төзелә. Былтыр безнең Африка илләре белән берлектә ике зур халыкара чара узды», – дигән Нилов.