Дәниф Шәрәфетдиновның улы Динар: «Әтинең йөзенә кызыллык китермәсәм иде, дип борчылдым»
Җырчы Дәниф Шәрәфетдиновның улы Динар Шәрәфетдинов Казанда оештырылган «Безнең яшьлек җырлары» концертында беренче тапкыр зур сәхнәдә чыгыш ясаган иде. Дәниф Шәрәфетдинов авырып китү сәбәпле, башкала тамашачысы алдында җырларга концертны оештыручы «Күңел» радиосы аның улы Динарны чакырган, һәм ул бик теләп риза булган.
«Күңел» радиосы алып баручылары Динардан хис-кичерешләрен сорашкан видеоны социаль челтәргә куйган.
«Әлбәттә, мин бик нык дулкынланам. Горурлану хисләре дә бар. Әтиемнең җырларын тамашачы минем башкаруда кабул итәр, дип ышанам», – дигән ул.
Динар концерттан соң: «Концертта катнашуым берничә көн алдан гына билгеле булса да, әтием башкарырга тиешле хит җырларын җиренә җиткереп башкарып чыга алуым белән бәхетлемен. Концерт алдыннан да бит, әтинең йөзенә кызыллык китермәсәм генә ярар иде, дигән борчуларым бар иде», – дип хис-тойгылары белән уртаклашкан.
«13 декабрь көнне Яр Чаллы шәһәренең Сара Садыйкова исемендәге концертлар залында да Динар әтисенең җырларын башкарачак», – дип язалар радионың социаль челтәрдәге сәхифәсендә.