Чаллы педиатры Николай Зотов белән бергә Тукай районынан Тимур Дунаев та һәлак булган
Мобилизациягә эләккән Чаллы педиатры Николай Зотовның Воронеж өлкәсендә автоһәлакәттә гомере өзелүе турында хәбәр иткән идек. Аның белән бергә булган 34 яшьлек Дунаев Тимур Данил улының да һәлак булуы билгеле булды. Алар Воронеж өлкәсенә Татарстаннан китерелгән гуманитар йөкне кабул итеп алыр өчен килә һәм, махсус хәрби операция зонасына киткәндә, Острогожск шәһәре янында авариягә юлыга. «Газель» автомобиле «УАЗ» белән маңгайга маңгай бәрелешә.
«Челнинские известия» хәбәр итүенчә, Тимур Дунаев Тукай районы «Татарстан» совхозында туган. Аның әти-әнисе әле дә шунда яши. Тимурның әтисе (пенсионер) якташлары җыйган гуманитар йөкне тапшырырга Воронежга барган, һәм алар шунда очрашканнар. Иртән әтисе Татарстанга юл тота, Николай белән Тимур, гуманитар йөкне махсус хәрби операция зонасына илтәргә дип, юлга чыга. Бераздан Тимурның әтисенә фаҗига турында хәбәр килеп ирешә. Хәзерге вакытта ул Воронежда, дип яза «Челнинские известия».