Чирмешән районы Иске Кади авылында яшәүче блогер Равил Закировның киемнәр кибете ачуы җырчы Рузилә Хәйретдинова белән дуслыкның бетүенә китерде. Чөнки Рузилә дә – шундый ук ассортименттагы киемнәр кибете хуҗасы.
«Нәтиҗәләрне үзегез ясагыз. Бу хәл миңа тагын бер тапкыр кешеләрне артык якын китермәскә һәм беркемгә дә ышанмаска кирәклеген төшенергә ярдәм итте.
Тәүлек буе янәшәмдә булган, мин ышанган һәм бизнес алып баруның бөтен нечкәлекләрен сөйләгән кеше… Дәвам итәсем дә килми. Үзегез аңлагыз», – дип язган иде үпкәле тонда Рузилә Хәйретдинова.
Равил Закировның кибете озак эшләмәде. Блогер кибетен ябарга мәҗбүр булган. «Кыскача гына әйткәндә, мин өлгермәдем. Авыл һәм шәһәр тормышын бергә алып бара алмадым. Команда җыйсаң да, хуҗадан – үзеңнән башка аны үстереп булмый. Икенчедән, бу эшкә бик күп вакыт кирәк. Миңа бик ошады, кыска вакыт кына булса да кибетем булуына шатмын. Бу – зур тәҗрибә», – дип сөйли ул.