Аш-су блогеры Рәмзия Вәлиеваның гаиләсенә чираттагы кайгы килде. Моннан берничә ел элек кенә аның улы яшьли вафат булган иде. Аннан соң кызы бик катлаулы операция кичерде. Бу юлы хәсрәт тагын кызы гаиләсенә төшкән. Рәмзия Вәлиеваның кияве махсус хәрби операциядә һәлак булган, тик бүгенгә кадәр аларда өмет яшәгән әле.
Бу начар хәбәр килеп ирешкәч тә, Рәмзия апаның оныкларыннан ДНК алдылар. Бәлки, һәлак булган хәрби аларның әтиләре түгелдер, дигән өметләре дә бар иде. Тик, кызганыч, өметләре акланмый.
«Соңгы озату булган... Соңгы өмет өзелде... Эх, ничекләр саклап кала алырмын сезне, балакайларым», – дип язды Рәмзия Вәлиева сторисларында, оныклары, кызын жәлләп, күз яшьләрен түгеп.
Иренең һәлак булуы билгеле булгач, блогерның кызының да хәле начарланган. Аңа «ашыгыч ярдәм» чакыртырга туры килгән.
Рәмзия Вәлиеваның һәм якыннарының тирән кайгысын уртаклашабыз…