Блогер Гөлнара Габдуллина: «Энемнең җаны туачак балама күчкәндер, дигән уйлар да килә»

Аш-су блогеры Гөлнара Габдуллина гаиләсе бу көннәрдә зур кайгы кичерүе турында хәбәр иткән идек. Аның бертуган энесе махсус операциядә һәлак булды. Гөлнара Габдуллина социаль челтәрләрдә энесен соңгы юлга озатырга ярдәм иткән, үзләренә терәк булган барлык кешеләргә рәхмәт белдерде. Энесе турында фикерләре, хис-кичерешләре белән уртаклашып, алга таба әлеге теманың ябык булачагын әйтте.

Гөлнара Габдуллинага яшьли гүр иясе булган энесе өчен генә түгел, карынындагы сабые өчен дә борчылырга туры килгән. Блогер өченче тапкыр әни булырга әзерләнә.

«Миңа бу араларда нык авыр булды. Нәкъ шушы вакытта минем бәләкәчемә җан керде. Бик күпләр: «Малай булыр, аңа энеңнең җаны кергәндер», – диләр. Дөресен әйткәндә, кайчак үзем дә шулай уйлыйм. Аллаһка шөкер, бәләкәчем белән барысы да яхшы. Бу айда бала турында уйлау булмады, төшмәсә ярар иде, дип тә курыктым. Аппетитым юк иде, күп еладым.

Энем белән яшь аермабыз 2 ел. Бергә үстек, бергә уйнадык. Гел бергә булдык. Хәзер уйлыйм, эх, шулай буласын белсәм, ныграк кочаклаган, үпкән, күңелемне ачып сөйләшкән булыр идем үзе белән.

Без быел гыйнварда 2 көнгә авылга кайттык. Энем дә отпускыда иде. Кайтыргамы-кайтмаскамы, дип икеләндем, чөнки токсикоз вакытым иде. Шулай да, җыенып, кайтып килдек. Аллаһка шөкер, сөенеп бетә алмыйм кайтканыбызга. Биш бала без гаиләдә, барыбыз бергә җыелдык. Энемне кайтып күрергә өлгергәнемә шатланам. Энем исә нык арыган, күзләре дә бик моңсу иде.

Бик күп кешеләр кайгыбызны уртаклашты. Бер генә негатив булды – «акча өчен киткән» дип яздылар. Кем-кем, әмма минем энем акча өчен киткән кеше түгел. 2 тапкыр яраланды. Беренчесендә госпитальдә дә ятмады, чөнки иптәшләрен уйлады. Икенче яраланганда, Ростовта госпитальдә ятты, кыйпылчыклары бик күп иде. Азрак ял ит, дигәч тә, «сугыш беткәч алдырам кыйпылчыкларны, мин егетләргә кирәк» дип китеп барды. Гел хезмәттәшләрен кайгыртты. Үзе кыйпылчыклары белән җәфаланып йөрде. Аңа дан-шөһрәт тә, медальләр дә, акчалар да кирәкмәде. Минем әни энемне «коммунист» дип йөртә. Медальләрен дә әни әйткәнгә генә барып ала иде. Миңа «показуха» кирәкми, дип йөрде. Шул дәрәҗәдә гадел кеше иде ул. Хезмәттәшлләре, командиры да бик яхшы сүзләр белән генә искә алалар үзен.

Күпме егетләрне сугыш кырыннан алып чыккан ул. Бик горурланабыз аның белән. Мин энемне чын батыр дип әйтә алам. «Малаем туса, синең исемеңне кушам», – дип әйткән егетләр дә булган үзенә. Кешеләрне коткарып, яралыларны алып чыга иде ул. Медик иде энем.

Дусларыма, туганнарга, язылучыларыма кайгыбызны уртаклашканыгыз өчен, безнең белән булганыгыз өчен зур рәхмәт. Сезгә мондый ачы кайгылар күрергә язмасын, сугышлар туктасын. Калган егетләребез исән-сау кайтсыннар.

Бик зур рәхмәт энемне алып кайтырга ярдәм итүчеләргә. Бу – бик авыр процесс икән. Рамазан башланган көнне вафат булды. 2 атна көттек гәүдәсен. Изге айда китеп барды», – ди блогер.

Гөлнара: «Ни өчен энеңне табут белән җирләдегез?» – дигән сорауга да җавап биргән.

«Аны шулай алып кайттылар. Кургаш табутта. Без аны ачмаска тиеш идек. Ләкин зиратта әти ачып караячак, дип килештек. Без энемне мөселман кануннары буенча, табутсыз җирләдек. Әти шулай теләде. Табутны ачарга кирәк, чөнки, бутап, башка кешенең җәсәден кайтарган очраклар да була икән», – диде Гөлнара.