"Башларыгыз, колакларыгыз нигә селкенми дип кычкырып торуны тыяр идем". Зифа Нагаева журналист Ришат Төхвәтуллинга эстраданы тәнкыйтьләгән
Ришат Төхвәтуллин журналист һөнәрен үзләштергән. Зифа Нагаевадан интервью алып, инстаграмга элеп куйган. Шул сәбәпле, без Ришатны "журналист" дип атый алабыз дип уйлыйбыз.
Ришатның “Клуб һәм банкет чараларының сәхнәгә күчүе турында нәрсә уйлыйсыз?”, дигән соравына Зифа ханым болай дип җавап бирде:
“Бервакыт безнең татар-башкорт эстрадасында артистларыбызның банкетка барып җырлап кайтулары модага кереп китте. Халык ярата бит мәҗлесләрдә утырырга, димәк сәхнәдән мәҗлес дәрәҗәсендә җырласаң, аралашсаң, тамашачыны җәлеп итеп була дигән фикер дә йөри башлады. Бу бит артистларның күпләренә бик отышлы да булды. Күпләре үзләрен шулай итеп таптылар”, - ди ул.
Зифа Нагаева үзе дә банкетларга йөрүе турында әйтте. Ләкин, аның сүзләренчә, банкетларда җырлау ул гаиләнең матди ягын гына кайгырту һәм аны сәнгать белән бутарга ярамый.
“Зур мәдәният сарайларын тутырып, тамада роленә кереп, утларны куеп, бишәр-алтышар көнлек концертларны уздыралар. Алай гына да түгел, җыр җырлаган арада нинди җыр тыңлаганнарын аңлап та булмый. Мин хәтта сәхнәдән куплет башлану белән “Уфа, син кайда? Казан, мине ишетәсеңме? Кулларыгыз, аякларыгыз кайда? Башларыгыз, колакларыгыз ник селкенми?” дип өч куплет буена кычкырып торуны тыяр идем. Халык шуңа күпме ныграк чырылдап, акырып җавап бирә, димәк шулкадәр син аны җиңгәнсең дигән фикер белән сәхнә артына чыгып китүләр дә башланды”, - ди ул.
“Бу - авыру, бу - чир, бу - мәңгелек түгел, - сүзен дәвам итә Зифа ханым. – Бу сәхнәдә комплексовать итү, үзеңне эзләп таба алмау дигәнне аңлата һәм бу халәт безнең сәнгатебезне артка сөйри. Шуңа күрә “Зыялы тамашачылардан артка калмыйк!” - дип сәхнәдә көч салучы егет-кызларыбызны көтеп калабыз”.