Башкортстанда карлы кыр уртасында бия колынлаган
Башкорт токымлы атларга печән дә, башка төрле фураж да әзерлисе юк, алар ризыкны үзләре табып ашый.
Башкортстанның Әбҗәлил районында бия колынын карлы кыр уртасында дөньяга китергән. Колын икенче көнне үк әнисе янында чаптырып йөри дә башлаган. Бу турыда блогер Артур Идельбаевка сылтама белән «Башинформ» хәбәр итте.
«Кичә төнлә белән Әбҗәлил районында башкорт токымлы бия колынлады. Кырда. Кар өстендә… Елның бу чорында ярымкыргый башкорт токымлы атлар кырда утлап йөри. Кыш көнендә дә. Алар ярты метр тирәнлектәге кар астыннан үлән табып ашый. Аларга шул җитә. Башкорт атлары талымсыз һәм чыдам алар. Нәкъ менә шул сыйфатлар безнең атчылар өчен икътисад нигезе була да инде», — ди Артур.
Блогер башкорт токымлы атлар чыдам һәм талымсыз булу аларны асрауны табышлы итүен әйтә. Атларга печән дә, башка төрле фураж да әзерлисе юк, үзләренә кирәкне алар үзләре табып ашый.
«Ел әйләнәсе кырда булгач, алар салкынга чыдам. 40 градуслы суыкта, үтәли җил булганда да алар ачык далада үзләрен яхшы хис итә. Видеода күренгәнчә, кайсыбер бияләр декабрьдә дә колынлый. Карлы кырда. Аннары бер көн узуга колын әнисенә ияреп йөри дә башлый», — ди блогер.
- Башкортстанда балалар утырган машина юлда йөри торган ат белән колынга бәрелгәч, өч үсмер үлгән, икесе авыр хәлдә, дип язган идек.