«Бәлки тамашаны кичектерергә кирәк булгандыр?» – Фирүзә Ибәтуллина «Татар җыры» турында
Кичә башкалабызда «Татар җыры-2022» концерты гөрләде. Кайчандыр шушы тамашада катнашып, иҗатташ дуслары белән бергә сәхнә түрендә балкып йөргән җырчы Эльмира Сөләйманова да нәкъ менә кичә җир куенына иңдерелде...
Шушы вакыйгаларга мөнәсәбәтле, Хәния Фәрхинең бертуган сеңлесе Фирүзә Ибәтуллина «Татар җыры»ның кичектерелмәвен, ә киресенчә гөрләп узуын килештермәгән һәм социаль челтәрләрдә ул үз фикере белән уртаклашкан.
«Татар җыры» бара. Күзем белән карыйм, йөрәгем белән бер җырны да кабул итәлмим. Күздән яшь чыкмый, җан елый. Җан елавы бигрәк авыр... Эльмира, моңлы сандугачкай, син дә бүген бу сәхнәдә җырлар идең, дип уйлыйм. Ә син бүген мәңгелек иленә юл тоттың...
Бәлки, бүген бу тамашаны, бик зур «Татар җыры» булуына да карамастан, кичектерергә кирәк булгандыр, алдагы Яңа еллар киченә?.. Тормыш дәвам итә, дисәләр дә... Якын кешеңне мәңгелеккә озатканда... Җырлап та буладыр шул... Әллә нишләде дөньясы, әллә нишләде кешеләре. Кояшым (Фирүзә ханым мәрхүм апасы Хәния Фәрхине шулай атый. – авт.) изге затлардан иде. Кеше хәсрәтенә кайгырды, шатлыкларына чын күңелдән шатлана белде. Кызганыч, хәзер андый затлар бик сирәк шул», – дип язган ул.
«Йөз процент сезнең белән килешәм! Нәкъ мин уйлаганны язгансыз!», «Әйе, концертны кичектерсәләр дә була иде. Акча чире...», «Фирүзә, бик дөрес! Йөрәк елый, күзләр тулы яшь. Бәлки, мине гаепләрләр. Минемчә, Эльмира белән хушлашуны Чаллының мәдәният йортында оештырырга кирәк булгандыр... Аны яраткан, хөрмәт иткән халык чиксез бит. Ачуланмагыз, хушлашырга килүче хезмәттәшләре дә бик аз булуына аптырадым. Бәлки, шул «Татар җыры» сәбәпче булгандыр...», «Кеше кайгысына беркемнең дә исе китми, бәйрәм ясарга түгел иде», «Үзеңнеке – үзәктә, кешенеке – кештәктә, дигән бит борынгылар», «Ничәнче көн халык елый, Эльмира дип. Ә артистлар үзләре турында елмаешып матур постлар куйдылар, көлделәр, матур күлмәкләрен күрсәттеләр. Шаккатам...» – дип хуплаганнар Фирүзә ханымның фикерләрен виртуаль дуслары.
Фото: Фирүзә Ибәтуллинаның социаль челтәрдәге аккаунтыннан