«Баланың бөтен тәнендә тиресе кубып төште». Үсмер малай кайнар сулы коега егылган

26 октябрьдә Екатеринбургта 14 яшьлек үсмер малай кайнар сулы коега егылып төшкән. Аны таксист ир-ат коткарган. Бу турыда «Комсомольская правда» хәбәр итте.

Канализация коесын, люк урынына, тәрәзә рамы белән генә каплап калдырганнар. Бала пыялага баскан да егылып төшкән.

Таксист ир-ат кичке 6лар тирәсендә бер ишегалдына килә. «Мин ишегалдына килдем, караңгы иде. Яныма бер малай йөгереп килде. «Ярдәм итегез, дустым коега егылып төште!» – ди. Мин ярдәм итәргә йөгердем, кап-кайнар су дип, күз алдыма да килмәде», – ди ул.

Бала коедан чыгарга маташа, авыртудан кычкыра, бик каты пешкән, ди таксист. Аннан пар күтәрелә.

«Мин малайны машинага алып барып, арткы утыргычка салдым. Дустын да утырттым да хастаханәгә илттем», – ди таксист.

Юлда аларга «ашыгыч ярдәм» очрый, табиблар баланы үзләренә ала.

«Юлда чакта малай эчке киемгә кадәр чишенде, аңа кызу иде, авыртты да. Аны «ашыгыч ярдәм»гә кадәр күтәреп алып барганда күрдем – кулларыннан, аякларыннан, бөтен җиреннән тиресе купкан, коточкыч!» – ди таксист.

Сәламәтлек саклау министрлыгы белешмәсе буенча, баланың тәненең 50 проценты пешкән. Хәле стабиль катлаулы, аны табиблар дәвалый.

Урынга тикшерүчеләр барган, коены койма белән әйләндереп куйганнар. Тикшерү бара, диелә хәбәрдә.