Туй гаепсез булмый, ди халык. Бөтенроссия авыл Сабан туенда да ызгыш-талашларсыз гына булмады. Көрәш барганда Әстерхан вәкилләре, хөкемдарларның бәясе белән килешмичә, сугыша башлады.
Бу ызгыш 85 кг үлчәү авырлыгында Әстерханнан Ренат Гасанов белән Татарстанның Кукмара районыннан Илнур Гобәйдуллин өченче урын өчен көрәшкәндә чыкты. Ренат Гасанов 5:2 белән отып барганда, аңа өченче кисәтү бирделәр. Шуннан Әстерхан вәкилләре хөкемдарларны дөрес хөкем итмәүдә гаепләде. «Дөрес бәяләгез! Әллә ничә тапкыр очты бит инде!» – дип дулады вәкилләр. Хөкемдарларга төрле сүгенү сүзләре дә яудырдылар.
Нәтиҗәдә, хөкемдарлар видеодан кабатлап карады һәм кисәтү булмавын белдерде һәм Әстерхан көрәшчесе Ренат Гасанов 85 кг үлчәү авырлыгында өченче урын яулады.
