Арча районында фермер хуҗалыгында янгын: «Килде пожарка. Янып беткәч...»
Мессенджерлардагы төркемнәрдә Арча районы Күлтәс авылында булган янгын видеосы таралды. Видеода күренгәнчә, янгын төнлә булган. Янгын фермер хуҗалыгының техника гаражында чыккан, тракторлар янган.
«Түбәсе янып, җимерелеп бетте инде, эчендә техника булган. 2-3 тракторны чыгардылар. Эчтә 1-2 сүтелгән трактор калган. Гаражның бер башында бухгалтерия булган, документация», – дип сөйли видеоны төшергән ир-ат.
Шул вакытта янгын сүндерү машиналары килә. «Арчаныкымы, Лесхозныкымы килде пожарка. Янып беткәч», – дип әйтә ул.
Үрнәк авыл җирлеге башлыгы Васил Габделхаков бу гаражның фермер Айрат Сафиуллинныкы булуын әйтте. Ул да ремонтта булган 2 тракторның януын раслады.
Айрат Сафиуллин шулай ук «Пионер» хуҗалыгын җитәкли. Ул Арча районында юкка чыккан Пионер авылына җан өрүче, аны торгызучы кеше буларак билгеле. Җитәкче «Интертат»ка авылны торгызу буенча башкарылган эшләр турында сөйләгән иде.
Айрат Сафиуллинның үзе белән элемтәгә кереп булмады, белүебезчә, ул янгын нәтиҗәләрен хәл итү белән мәшгуль. Районның авыл хуҗалыгы һәм азык-төлек идарәсе җитәкчесе, шәхси хуҗалык булу сәбәпле, бу хакта мәгълүмат бирә алмавын әйтте.