Әнвәр Нургалиев туганы үлемендә гаепле кешегә чыгарылган хөкем карарына фикерен әйтте
Башкортстанның Чишмә районы суды Әнвәр Нургалиевның туганы Диана Сәфәрова үлеменә китергән авариядә гаепләнүче кешегә карата хөкем карары чыгарды, дип язган идек.
Әнвәр Нургалиев һәм Диананың башка туганнары ахыр чиктә Латыйпов үзенең гаебен таныр, гафу үтенер дип өметләнгән булганнар. Ләкин…
Бу хакта Әнвәр Нургалиев болай дип яза:
«Суд карары чыгарылды, дуслар… Аны гаепле дип таптылар һәм 7 елга колония-поселениегә хөкем иттеләр. Суд хөкеменнән кәнәгать калыр идек, әгәр дә ул үзенең гаебен танып, гафу үтенсә…
Авариядә Диананы гаепләү – яклаучыларның оятсызлыгы. Алар үзләрен хаклы булуларына һәм бу карар әлеге вакыйгаларның ахыры булмауга ышана», – дип сөйләгән Әнвәр Нургалиев.
Авариядә гаепләнүче шулай ук 3 елга транспорт чаралары белән идарә итү хокукыннан мәхрүм ителде. Ул зыян күрүче якка мораль зыян өчен 5 млн сум түләргә тиеш була.
Тикшерү барышында ачыкланганча, җинаятьтә гаепләнүче ир-ат 2023 елның 9 маенда исерек килеш «Тойота Камри» машинасы руле артына утыра. Ул Чишмә бистәсендәге Революция урамыннан зур тизлектә бара. Алдагы машинаны узганда, яндагы интервалны сакламый. Шул сәбәпле 32 яшьлек Диана Сәфәрова идарә иткән «Хонда Цивик» машинасы баганага бәрелә. Диана урында ук үлә. Авариядә гаепләнүче урыннан кача. Мәрхүмәнең 3 баласы ятим калды. Аларны бабасы белән әбисе тәрбияли, Әнвәр Нургалив гаиләсе дә ярдәм итә.
