Украинада БТР куып киткән Фәниснең һәлак булына әнисе ышанмый: «Улым, шалтырат әле...»
Украинада БТР куып алып киткән, бик күп батырлыклар кылган Тәтешле егете Фәнис Хөсәенов һәлак булган, дип язган идек.
Әлеге хәбәрне безгә Тәтешле районы Яңа Кайпан авылы да кергән Булкайпан авыл җирлеге башлыгы Флюр Зиннәтуллин раслады. Тик Фәниснең әнисе Фәридә ханым Хөсәенова гына әлеге сүзләргә ышанырга теләми. Ана йөрәге баласының исән булуына өметен өзми. Фәридә апа үзенең социаль челтәрләренә дә һәр ананы елатырлык шигырь урнаштырган.
Күңелемнең моңсу чагы,
Улым, шалтырат әле.
Матур хәбәрләрең белән
Сагышны тарат әле.
Сезне уйлап торган мәлем,
Ниләр эшлисез икән?
Сез дә шулай минем кебек
Мине уйлыйсыз микән?
«Әни, син чирләмә», – диеп
Әйткән сүзләрегезне
Күңелемдә йөртәмен,
Сез шуны беләсезме?
Шалтырат әле, улым, син,
Тагын шулай кабатла.
Көнем җырлап кына бара,
Йөзем балкый азакта.
Улым, шалтырат әле…
«Мин ышанмыйм!» – дип язган Фәридә апа…
Фәридә апа «Интертат»ка: «Фәнис – минем бөтен ышанычым инде ул», – дип сөйләгән иде.