Алып баручы Ильмир Ямалов үзенең беренче җырын яздырган. Ринас Әхмәтов көе, Гөлфия Шакирова сүзләренә иҗат ителгән җыр иң кадерле кешеләребез – әниләребезгә багышлана.
«Сәхнәгә үзем яздырып чыгарган җырларым, гомумән, юк иде. Бу – беренче җырым. Әниләр, гаилә, туган як темасы үземә бик якын. Материал эзләгәндә шушы юллар күзгә чалынгач, артык уйланып тормадым, эләктереп алдым.
Тырышлык, кешелек сыйфатларын безгә әни бирде, хезмәт сөяргә өйрәтте. Шунысы сөенеч, әниебез белән без көн саен элемтәдә. Авылга еш кайтырга тырышабыз. Әни белән, барлык эшләрне читкә куеп, матур балачагыбыз турында сәгатьләр буе сөйләшеп утыра алабыз», – диде Ильмир нәкъ менә әлеге җырны сайлавы хакында.
Җырны барлык музыкаль мәйданнарда тыңларга мөмкин.