Алсу Сөнгатуллинаның әтисе яман шештән вафат булган
«Фәридә-Алсу» дуэты солисткасы Алсу Сөнгатуллинага быел сынауларны мулдан кичерергә туры килде.
Кичә Алсуның әтисе, май аенда 72 яшен тутырган Хөрмәтулла абый вафат булган. «Интертат» сайты һәм Казан шәһәр филармониясе коллективы Алсуның, барлык якыннарының авыр кайгысын уртаклаша, мәрхүмнең урыны җәннәт түрләрендә булсын.
«Әтиемнең сәламәтлеге гомер буе нык булды, беркайчан да җитди итеп авырмады, табибларга йөрмәде, дару үләннәре җыю белән мавыга иде, шулар белән дәваланды. Мәкерле онкология чире билгеләрен дә безгә әйтмичә яшереп йөргән, узар әле, үләннәр ярдәмендә сихәтләнермен дип яшәгән. Бу хакта ярты ел элек белдек, әйдә, барыйк дип ялына-ялына табибларга йөртә башладык. Ләкин соң иде инде, авыру тамырын ныклап җәйгән, соңгы арада хәле бик кискенләшкән иде. Сәламәтлегебез турында кайгыртырга кирәк, җиңелчә карашта булырга ярамый. Еш тикшеренергә, замана чирләре белән вакытында һәм актив көрәшергә кирәк шул», — дип сөйләде җырчы «Интертат»ка.
Алсу Сөнгатуллинага быел улы белән бәйле авыр хәсрәтне дә кичерергә туры килде. Аның улы 175 гимназиядә булган атышта булып яраланган иде.