«Әкият» Казахстан фестивалендә үзенең «ужастигы» – «Адәмнәр» спектаклен күрсәтәчәк

«Әкият» Татар дәүләт академия курчак театры «Almaty Puppet Festival – 2026» IV Халыкара курчак театрлары фестивалендә катнашачак. Театр фестивальгә «Адәмнәр» спектаклен алып бара. Спектакль татар телендә күрсәтеләчәк.

Спектакль 23 октябрьдә Алматы дәүләт академия курчак театры сәхнәсендә барачак.

• «Адәмнәр» спектакле Галимҗан Ибраһимов әсәре буенча куелган. Режиссер - Илгиз Зәйниев. «Адәмнәр» спектакле профессиональ җәмәгатьчелек тарафыннан танылды: спектакль дәрәҗәле «Алтын битлек» милли премиясенә дүрт номинация белән билгеләнде, Екатеринбургта «Петрушка Великий» халыкара фестивалендә «Иң яхшы режиссер эше» номинациясендә җиңү яулады.
• Спектакльдә ике артист – Альбина Шаһалиева һәм Дилүс Хуҗәхмәтов уйный.
• Быел фестивальгә дөньяның 11 иленнән - Италия, Франция, Төркия, Иран, Азербайҗан һәм башкалардан 14 театр җыелачак.