Тукай районы Мәләкәс авылы Сабан туенда Айдар Галимов белән Мөнир Рахмаев көянтә-чиләк белән су ташыган. Күңелле видео белән «Күңел» радиосындагы «Тукай авазы» тапшыруының социаль челтәрдәге сәхифәсендә уртаклашканнар.
«Первый раз. Бу – мин, мин бу! Җырласаң, җырла «Мәләкәс» диеп. Беренче тапкыр алъяпкыч киям», –- дигән Сабан туеның кунагы – Татарстанның һәм Башкорстанның халык артисты Айдар Галимов.
Мөнир Рамаев үзе дә мондый чараларны еш алып бара. Шуңа бер дә сер бирмәгән. Җырчыга көянтә белән су ташу ошап та киткән бугай әле.
Бәйрәмнең алып баручысы Илмир Ямалов көянтә белән су ташучы «кызларны» мәйдан әйләнәсе йөртеп алгач, «чишмәгә» – янгын сүндерү машинасы янына суга җибәргән. Артистлар сынатмаган – мөлдерәмә тулы чиләкләрен күтәреп, финишка бик тиз әйләнеп килгәннәр.