Әгерҗе егетләрен татарча көрәштән кем мәхрүм иткән?

23 октябрь 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Динә ЙОСЫПОВА
Фото: "Татар-информ", agriz-rt.ru
Күптән түгел көрәш буенча үткән Татарстан чемпионатына үз районнарына дан китерерлек көрәшчеләргә бай Әгерҗедән бер спортчы да килмәде. Без моның сәбәпләрен ачыкладык.
Әгерҗе көрәшчеләренең ярышларда катнашмавына Татарстан спорт министрының беренче урынбасары Хәлил Шәйхетдинов та шелтә белдерде. "Татар-информ" мәгълүмат агентлыгына биргән интервьюсында ул: "Ни өчен бүген Әгерҗе районы көрәшчеләре ярышларда катнашмый? Анда сәләтле, тырыш тренерлар, көрәшчеләр бар. Республика җитәкчелеге биредә спорт комплексы төзегән, келәме дә бар, барлык шартлар тудырылган. Ни сәбәпле бу район командасы Татарстан чемпионатына килмәде? Ни өчен Казан шәһәренә килеп, көрәштә катнашу мөмкинлеге булдырылмады: финанслар, транспорт бирелмәде? Ир-егетләр ел дәвамында бу ярышка әзерләнгәннәр бит. Журналистлар район хакимиятеннән, спорт идарәсе җитәкчесеннән, шул районның тренерыннан, ел буе республика беренчелегенә әзерләнгән көрәшчедән сорау алып, камерага фикерен әйттерергә тиеш", - дип сөйләде ул.


“Көрәш хәзер беркемгә дә кирәк түгел”

Әгерҗедән көрәш тренеры, Көчек авылы мәктәбендә көрәш түгәрәген оештырган Альфред Сабирҗанов сүзләренчә, районда зур уңышларга ирешә алырлык көрәшче егетләр күп. Егетләргә ярышларга барырга автобус та бирмиләр, чыгымнарны да капламыйлар икән. Альфред абый көрәш ярышлары булган саен егетләрне үз машинасында алып бара. Ә бит әле аның юлдан соң егетләрне ярыштырасы да бар. “Малайларны жәллим мин, шуңа күрә машинама утыртам да, алып китәм. Аптырап утырсаң монда...” - ди ул.

Әгерҗе районы башлыгы Республика күләмендәге көрәш турында белмәгәндер дип уйларлык җирлек юк, чөнки һәр районга нигезләмә җибәрелә. 

- Мин бу турыда сөйләшеп туйдым инде. Автобус ватык диләр, командировка акчасын бирмиләр. Әле элеккеге ярышлар өчен дә командировка акчасын бирмиләр. Хәзер сөйләшәсе дә килми. Мин пенсиядә бит инде, 67нче яшем китте. Һаман да шул егетләрне жәлләп... Безнең җитәкчелеккә көрәш кирәкми. Мин көрәшне яраткан, безнең Әгерҗе районы көрәшенә ярдәм иткән бер генә кешене беләм, ул – Илгиз Салихов. Ярышларга үзе дә килеп утыра иде, ярышларның иганәчесе дә ул иде. Әмма ул бездән киткәч, беркемгә дә көрәшнең кирәге калмады. Егетләрне ярышларга йөртергә кирәк, алар белән эшләргә кирәк. Аларның да бит ярышасы килә, бара алмаган очракта кәефләре төшә. Ярышларга бер бармый башлагач, алар шиңә башлыйлар, - дип уфтана Сабирҗанов.    

“Теләгебез бар, мөмкинлек юк”

Әгерҗе районы Шаршады авылы егете Динар Хәсәнов бүгенге көндә Чаллыда политехника көллиятендә белем ала. Динарга 16 яшь, ул ялларда авылга кайткан саен, Көчектә тренер Альфред абый Сабирҗанов җитәкчелегендә көрәш белән шөгыльләнә. Динарның Әгерҗе районы вәкиле булып ярышларга барасы килгән, әмма... 

- Безгә беркайчан да автобус бирмиләр. Нигә бирмәгәннәрен белгән дә юк. Районда көрәшче егетләребез күп үзе. Республика беренчелегенә узган ярышларга без бара алмадык инде. Теләгебез булса да, барырга мөмкинлек булмады, - дип сөйләде ул.

“Ярышларга автобус белән бару дигән нәрсә бетте инде ул”

Әгерҗе районының лаеклы көрәшче егете, Көчек авылыннан Дәниф Галиуллин быел апрель аенда Актанышта Татарстан Республикасының беренче Президенты Минтимер Шәймиев Кубогына узган милли көрәш бәйгесендә беренче урынны яулаган иде. Дәниф туган төбәгендә көрәшкә игътибарны бик сүлпән дип бәяләде.

- Спортчыларга ярышларга бару өчен автобус бирү дигән әйбер турында онытыгыз инде сез. Аны биргәннәре дә юк, бирмиләр дә, бирмәсләр дә инде. Безне, көрәшче егетләрне, тренерыбыз үз машинасына утыртып, ярышларга алып бара иде. Бездә шул үзең барсаң инде, башкача булмый, - диде Дәниф.

"Менә тренерым турында бер начар сүз дә әйтә алмыйм. Ул бик көчле иде, әйбәтләп өйрәтә иде", - дип тә өстәде ул. 

“Спорт өчен җаваплы кешебез рәхәткә чыкты”

Әгерҗе районы башлыгы Валерий Макаров “Татар-информ” хәбәрчесеннән “автобус бирмиләр” дигән сүзне ишеткәч, шаккатты. Ул, күрәсең, көрәшчеләрнең ярышларга үз машиналарында барганнарын белми дә. Әгерҗе районында бүгенге көндә спорт өчен җаваплы кешене эштән чыгарырга ниятләүләрен әйтте, ул кешене “бик тә ялкау” дип атады.

- “Автобус бирмиләр” дип, кем әйтә аны? Җитмәсә балаларга... Бездә өч автобус тора. Ал да кит, кайсын телисең. Без бүгенге көндә спорт өчен җаваплы Илшат Гәйнетдиновны эштән җибәрергә йөрибез. Нәкъ менә көрәшчеләргә, башкаларга тиешлечә игътибар итмәгәне өчен. Ул гомумән рәхәткә чыкты, ялкау шундый! 

Фото: agriz-rt.ru
“Көрәш татар халкының яшәү рәвеше булырга тиеш”

Татар көрәшенә игътибар итмәүнең нәтиҗәсе нинди булырга мөмкин? “Татар-информ” хәбәрчесе Әгерҗе районында туып үскән шәхес, депутат, Татарстан халыклары Дуслыгы йорты директоры Ирек Шәриповның фикерен сорады.

- Көрәшкә көндәлек игътибар булырга тиеш. Аны татар халкының милли гадәте һәм яшәү рәвеше дәрәҗәсенә җиткерергә кирәк. Кавказ халыклары өчен, мәсәлән, көрәшү – ул гадәти хәл. Анда һәркем көрәшә. Дагыстан якларында да көрәш белән бик актив шөгыльләнәләр. Без дә көрәшне “гадәти хәл” дәрәҗәсенә җиткерсәк, бик яхшы булыр иде, - диде Ирек Шәрипов.


Фикерләр








Спорт

"Менә шулай җиңәргә кирәк ул!" Көрәш буенча Татарстан чемпионатыннан репортаж

23-24 нче ноябрь көннәрендә Казанның «Ак Барс» көрәш сараенда көрәш буенча Татарстан чемпионатында Республиканың иң көчле батырларын ачыкладылар. Икенче көнге ярымфинал һәм финал уеннарын «Татар-информ» хәбәрчесе дә күзәтеп кайтты.

Спорт

Олимпия чемпионкасы Наилә Гыйләҗева: “Татар теле җиңү яуларга булышты!”

Спортчы булу өчен көчле булу җитә дип уйлыйсызмы? Ялгышасыз! Спортта җиңү өчен татар телен белергә һәм акыллы булырга да кирәк икән. “Татар-информ” мәгълүмат агентлыгы хәбәрчесе мавыктыргыч, әмма шоу ясамый торган спорт төре - фехтование остасы Наилә Гыйләҗева белән сөйләшеп кайткач, шундый нәтиҗәгә килде. 

Спорт

"Татар үзе нинди - атлары да шундый"

15 сентябрьдә Арча районы Яңа Кырлай авылында “Ат көне” узды. Өченче тапкыр узган бәйрәмдә 118 спортчы катнашты. "Татар-информ" хәбәрчесе татар атларының нинди булуы, чабышта яулап алынган призның күпме өлеше җайдакка бирелүе һәм ат спортының республика өчен әһәмияте турында белеште.

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла