Замирә Рәҗәпова иреннән ничә яшькә олырак?
Тамада, конферансье Замирә Рәҗәпова инстаграмында ире Максим белән ничә яшь аермасы турында язган.
"Ирегезгә ничә яшь? Яшь аермагыз күпме? Әй, халык, беренчедән, мондый сорау бик үк корректлы түгел, тәрбияле кеше мондый сорау бирми. Минем сезгә: "Ә сезнең анда ни эшегез бар?" дип җавап бирәсем килә. Аннары инде "ярар, кайберәүләрне минем шәхси тормышым кызыксындырадыр", дим...
Әйе, ул миннән 5 яшькә кечерәк. Мин иртәрәк туганмын, ни хәл итәсең, гафу итегез! Әйе, ул 33 яшендә яшьтәшләреннән яшьрәк күренә. Геннарын да исәпкә алырга кирәк. Сез минем кайнанамны күрсәгез, ул да миннән яшьрәк күренә. Әйе, мин олырак күренәм, ләкин 38 яшь өчен нормаль дип саныйм. Әмма кайберәүләрнең мине карт дип төрттерәселәре килә. Эш бит анда түгел. Мин 5 яшькә олырак кешедә кияүдә булдым, аннан яшьрәк күренә идем, һәм шуннан? Без икебез дә бәхетсез идек", - дип язган Замирә. Аның беренче ире белән мөнәсәбәтләре турында моннан укыгыз.
Замирә мәхәббәт яшькә карамый, димәкче була. Ә сез нәрсә уйлыйсыз?