Зөлфәт Зиннуров: “Кырмыскаларда киңәшмә һәм планерка уздыру юк”
Инстадуслары бу тырыш бөҗәкләрнең пенсия яшен дә арттырмаулары турында язган.
Татар шоумены Зөлфәт Зиннуров көзге урманга гөмбә җыярга баргач, кырмыска оясына тап булган. “Менә шундый кырмыска оясы: йөгерешәләр, эшлиләр, бер совещание юк, бер планерка юк. Ләкин эшлиләр бит. Тырмашалар”, – дип язган Зөлфәт Зиннуров үзенең инстаграмына. Халыкка җитә калган, ул шунда ук кырмыскалар тормышын илебез сәясәтенә бәйләп, җаваплар тезгән: “Кырмысканың планеркага вакыты бармыни соң?! Ул бит эш белән мәшгуль!” “Нинди дөрес фикер – бернинди совещание юк, бернинди планерка юк...” “Депутатлар да кирәкми, сайлау да үткәрмиләр, урламыйлар да, пенсия яшен дә арттырып утырмыйлар...” “Бу кырмыскалар без бит ул – гади халык. Ә безнең өстән Зөлфәт караган кебек дәүләт карап утыра. Бик урынлы, хәзер бит бөтен жирдә халыкны камера төшерә”, – дигән берсе.