Элвин Грей сәламәтлегенә төзәлмәс зыян килүе турында сөйләде
Башкортстанның атказанган артисты Радик Юльякшин белән “Пирамида” концертлар залында “Дуслык күпере” II Бөтенроссия татар-башкорт эстрадасы фестиваленең тәүге концертында сөйләштек.
-Радик, сезнең турында “10 ел буе омтылган хыял” дигән документаль фильм чыкты. Сез анда акустик травмадан соң элеккегечә ишетә алмыйм, нәтиҗәләре әле дә бар дигән идегез. Бүгенге көндә дә дәваланасызмы?
-Әйе, нәтиҗәләре бар. Бүгенге көндә мин инде ничектер ияләндем, травма белән эшләргә өйрәндем. Нәрсә эшли алам соң инде мин? Аллаһы Тәгалә башка биреп алды.
-Колагыгыз берәр кайчан төзәләчәкме соң?
-Минем уйлавымча юк, чөнки анда нерв күзәнәкләренә зыян килде. Төзәлә алган күзәнәкләр төзәлде, ә үлгәннәре, ни кызганыч, юк. Минем колакта гел ниндидер чыелдау, шуңа күрә мин тыныч җирдә, телевизор эшләмәгәндә, тавыш булмаганда, музыка уйнамаганда акылдан язам. Колакта гел черелдәп тора. Шуңа күрә мин йокларга ятканда я музыка тыңлап, я телевизор карап ятам, - диде Радик Юльякшин.