Азат Фазлыев берьюлы 48 туңдырма ашап махмырлаган
Хәзер җырчының туңдырмага исе дә китми икән.
Җырчы Азат Фазлыев инстадусларына күңелле бер балачак хатирәсен сөйләде.
“Безнең өчен Сабантуй хәзер эш көне, ә элек зур бер бәйрәм кебек көтеп ала идек. Алдан акча җыеп, киемнәрне әзерләп.
Бер елны бәйрәмгә 50 сум акчам бар иде. Хәтерлисездер, элек Сабантуйдагы кибетләр ул – йөк машинасының арбасы иде, шуннан гына саталар иде. Мороженое да ел саен булмый иде. Ә бөтен бала шуны көтә. Ул елларда морозильниклар булмаган, күрәсең. Коробкасыннан гына, эреп беткәнче саталар иде.
Әни ул елны жюри составында иде, трибунада утыра, ә мин киттем кибетләргә. Мороженое килгән иде, 1 сумнан саталар. Ур-ра! Һәм мин сөенечемнән 48 туңдырма ашаган идем. Күз алдына китерәсезме? Салкын, җилле көндә бит әле ул! Бик өшегәнмен. Мине бер апа әнигә күтәреп алып килгән: “Бу бала мороженое ашый да ашый, туңып беткән”, - дигән.
Шул килеш, 48 туңдырма гына ашый алганмын. Югыйсә, калган 2 сумга тиясе 2се дә сыйган булыр иде.
Шуннан бирле туңдырмага исем китми”, - дип язган Азат Фазлыев.