Рифат Фәттахов Гөлсиринне магистратурада укытырга теләми: "Укуны Венера Ганиевада дәвам иттерүнең мәгьнәсен күрмим!"

15 июль 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Юлия НАСЫЙБУЛЛИНА
Фото: "Татар-информ"
Күптән түгел генә Гөлсирин Абдуллинаның югары уку йортын тәмамлап, зәңгәр диплом алуы хакында язган идек. Җырчының зәңгәр төстәге дипломы укучыларыбыз арасында шау-шу уятты. Гөлсириннең продюсеры да ризасызлык белдерде. "Шаккатмалы хәл, инде Гөлсирингә дә кызыл диплом бирмәгәч... Башкалар үпкәләмәсен, әмма Венера Ганиеваның быелгы чыгарылышы арасында профессиональ сәхнәдә иң зур уңышка ирешкәне Гөлсирин Абдуллина!" - диде Рифат әфәнде Фәттахов Интертатка.

Инстаграмда бу язмага "Нигә Гөлсириннең дипломы зәңгәр?", "Укымаган, концерт куеп йөргән", "Сез инде күптән кызыл дипломлы - эстрадада!" - дип борчылып язучылар да булды. Гөлсиринне, музыкага кагылышы булмаган "Фәнни тикшеренү нигезләре" дигән фәннән 4ле куеп, кызыл дипломсыз калдыру дөрес адым булды микән? Әлеге сорау белән җырчы кызның остазы Ганиева Венера Әхәт кызына мөрәҗәгать иттек.

 - Минем дә зәңгәр диплом иде. Дипломың зәңгәрме синең, кызылмы - ул бит киләчәгеңне хәл итми. Бүгенге көндә минем 4 укучым да Ваһапов фондында договор төзеп хезмәттәшлек итәләр. Быел аларны бик күп гастрольләргә йөртте, эшләтте господин Фәттахов (сүз Р.Ваһапов фонды җитәкчесе Рифат Фәттахов турында - ред.), балаларның укырга йөрергә дә вакытлары калмады, шул исәптән Гөлсириннең дә. Гастрольләрдән кайткач дәрескә киләләр, тавышлары арып беткән була. Шул арыган тавышларны кире формага кертү бик зур тырышлык һәм җаваплылык сорый. Рифат әфәнде Ваһапов фондында хезмәттәшлек итү өчен җырчыларны нәкъ менә Мәдәният институтыннан сайлады, консерваториядән түгел. Әлбәттә, без аңа бик рәхмәтле һәм аның ышанычын акларга тырышабыз. Шулай да кызыл диплом алыр өчен бит көне-төне укырга, дәресләргә әзерләнергә, семинарларда чыгыш ясарга кирәк. Һәрхәлдә Гөлсирин җыр буенча бишле билгесе алды. Дәүләт имтиханнарын да, дипломын да бишлегә яклады. Шуңа күрә бер дә борчылмагыз: киләчәк, тормыш ул үзе бәя бирә, барысын да үз урынына куя. Иң мөһиме - Гөлсирин инде танылган һәм тамашачы, халык тарафыннан кабул ителгән җырчыбыз!


- Әйе, чыннан да быел минем концертлар күп булды, диде Гөлсирин, укытучысының сүзләрен раслап. - Шуңа да карамастан мин укуны ташламадым, тырыштым, концертлардан төнге өчтә кайтып, иртән укуга йөгерә идем, - дип сөйләде җырчы.

Моңарчы Гөлсирин гел 5легә генә укыган, кызыл дипломга барган. Бер укытучы белән уртак телгә килә алмау нәтиҗәсендә, соңгы ел имтиханында аңа 4ле куйганнар.

- "Фәнни тикшеренү нигезләре" дигән фәннән имтиханда 4ле алдым, шуның аркасында кызыл дипломсыз калдым. Имтиханны яңадан биреп, шул 4лене төзәтергә теләгән идем, рөхсәт итмәделәр. Әй, "кызыллыкта" гына мени соң эш? Зәңгәрме, кызылмы, иң мөһиме кулымда дипломым, янымда үзем яраткан һәм мине хөрмәт иткән тамашачым бар! - диде Гөлсирин Абдуллина.


Ә менә Гөлсириннең продюсеры Рифат әфәнде Фәттахов зәңгәр дилом белән килешми һәм әлеге мәсьәләгә бик четерекле карый.

- Башкалар үпкәләмәсен, әмма Венера Ганиеваның быелгы чыгарылышы арасында профессиональ сәхнәдә иң зур уңышка ирешкәне - Гөлсирин Абдуллина! Аны хәзер халык белә, аның үз тамашачысы формалашып килә. Ә ул моңа ничек иреште соң?! Әлбәттә, концертларда, гастрольләрдә күп йөреп. Сәхнә яшь җырчыны үстерә, шомарта. Ә безгә килгәндә ул студентлар, кызганыч ки, сәхнәгә чыгарга бөтенләй әзерлексез була. Сәхнә хәрәкәтләрен бөтенләй белмиләр, сөйләм культурасы турында инде әйткән дә юк. Безгә, профессиональ режиссерлар, профессиональ актерлар, профессиональ нәфис сүз осталары чакырып, бу яшьләр белән бик нык эшләргә туры килә. Бәлки, киләчәктә мәдәният институты да студентлар белән сыйфатлырак эшли башлар?!

"Ә Гөлсириннең дипломына килгәндә, әлбәттә, шаккатмалы хәл. Инде Гөлсирингә дә кызыл диплом бирмәгәч... - дип аптырый Фәттахов. - Әмма Гөлсирингә борчылырга кирәкми: кызыл дипломны аңа халык үзе бирәчәк! Мин моңа ышанам! Гөлсирин тырышып эшләсә, иҗат итсә, аның Зур җырчы булып үсәргә бөтен мөмкинлекләре бар. Һәм шул вакытта аның белән бөтенесе дә горурланачак. Шул ук мәдәният институты да, шул ук Венера Ганиева да. Вакыт һәркемне, һәрнәрсәне үз урынына куя!!

Рифат Фәттахов үз тормышыннан мисал китерде:

- Заманында, университетны тәмамлаганда, берничә фәннән 4 лем бар иде. Минем остазым Флорид Әхмәтович Әгьзамов (урыны оҗмахта булсын) мине: "Әйдә, яңадан тапшыр бу имтиханнарны, син практикада зур уңышларга ирештең, сиңа кызыл диплом бирәсе килә", дип, кат-кат үгетләде. Әмма мин - җүләр, имтиханнарны яңадан тапшырып йөрмәдем... Аның каравы, безнең остазларыбыз студентлар турында ничек кайгырткан, ничек борчылган икән! Рәхмәт аларга! - дип хәтирәләрен яңартты Рифат әфәнде.

Сүз уңаеннан, шушы көннәрдә Венера Ганиева Гөлсирингә алга таба укуын дәвам иттерү, белемнәрен үстерү өчен магистратурага укырга керергә тәкъдим ясаган. Тик Гөлсирин генә әлегә җавап бирергә ашыкмый.

- Магистратурада бары ике генә түләүсез урын бар. Шуның берсен мин Гөлсирингә тәкъдим иттем. Әлегә аннан җавап юк. Чөнки продюсерлары Рифат Фәттахов Гөлсириннең алга таба укуын дәвам иттерүенә каршы килә. Мин үз чиратымда Гөлсиринне концертларга, гастрольләргә чыгарып җибәрергә әзер һәм бер вакытта да каршы килгәнем булмады. Килешү буенча Ваһапов фондына Гөлсириннең тагын ике ел эшлисе калды. Алга таба аның ничек хәрәкәт итәсе Аллаһ кулында. Шуңа күрә, бушка югары белем алу мөмкинлеге булганда, аны кулдан ычкындырырга ярамый. Рифат Фаттаховның Гөлсиринне укытырга каршы килүе белән килешмим һәм моны законсыз рәвештә кеше хокукларын бозу дип саныйм! - диде Венера Ганиева.

Рифат Фәттахов үз чиратында Гөлсириннең магистратурага кереп, укуын алга таба дәвам иттерүенә ни өчен каршы икәнен әйтте:

- Гөлсириннең магистратурада укуына, әлбәттә, мин каршы килә алмыйм. Әмма соңрак. Аның магистратурада уку өчен әле 10 ел вакыты бар, ә бүген аңа җиң сызганып эшләргә, үзен сәхнәдә күрсәтергә кирәк. Чөнки вакыт бара, конкуренция бик зур. Аннары, дөресен әйткәндә, Венера Ганиевада укуны дәвам иттерүнең шәхсән мин үзем мәгьнәсен дә күрмим, - дип сөйләде Рифат әфәнде.


Гөлсирин остазы Венера Ганиеваның тәкъдимен кабул итеп, укуын алга таба дәвам итәрме, әллә продюсеры Рифат Фәттаховны тыңлап, бушлай укудан баш тартырмы? Әлегә ул өзеп кенә төгәл җавап бирмәде. Барысы да шушы атна эчендә хәл ителәчәк, диде...

Фикерләр








Шоу-бизнес

"Мең дә биш йөз Салават абыебыз чыкты сәхнәгә, Айдар Галимовлар да санап бетергесез"

Режиссер, хореограф Артур Хәйруллин татар җырчыларының 99 проценты бер-берсенә охшаган, ди. Ул татар эстрадасында 1500 Салават Фәтхетдинов барлыгын санап чыгарган. Ә Альберт Нурминский татарның элекке түгел, хәзерге заман җырчыларын да белми. "Алар минем өчен үрнәк түгел", - ди.  Лилия Хәйруллина оештырган матбугат очрашуында татар эстрадасына бәя бирелде. 

Җәмгыять

Фирдүс Тямаев белән Илсөя Бәдретдинова Айваз Садыровка каршы: татарча хаталы язу наданлык түгел!

Алып баручы Айваз Садыйров Инстаграмда татарча дөрес язмаучы җырчыларны гаепләп чыкты. "Тарихчы Искәндәр Гыйләҗев, 80нче еллар белән чагыштырганда, хәзер наданнар күп, дигән иде. Килешмичә булмый шикелле”, дип язган ул. Моңа җавап итеп, җырчы Фирдус Тямаев Айваз Садыровны яшьләрне “надан”га чыгарып калдыруда гаепләде. Кемнәрнең Инстаграмы татарча, кемнәрнеке хаталы татарча? Социаль челтәрләрдә татарча хаталы язуның нәтиҗәсе нинди булырга мөмкин? "Татар-информ" хәбәрчесе шуны ачыклады.

Шоу-бизнес

Гөлназ Батталова, "Ямьле"дән китеп, икенче төркем оештыра: "Китүемә бер тамчы да үкенмим!"

Гөлназ Батталова "Ямьле" төркеменнән китте. Аның урынын кызлар Алинә Давыдовага тапшырды. "Мин "Ямьле" төркемендә 5 ел эшләдем. Хәтта, танылган продюсерлар да җырчы белән контрактны бары 5 елга төзиләр. Чөнки иҗат өлкәсе өчен 5 ел күп. Бигрәк тә ул хатын-кызлар белән бер төркемдә эшләгән вакытта сизелә. Яшермим, безнең дә төрле вакытлар булды" - дип сөйләде җырчы Интертатка. Сүз уңаеннан, әңгәмә барышында Гөлназ Батталова 20 ел буе бер составта эшләп килүче "Зөләйлә" төркеменә соклануын белдерде...

БАШКА ЯҢАЛЫКЛАР

Интертат.ру / Intertat.ru © 2001 - 2018 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла