Филүс Каһиров: Рәнҗеп яши алмыйм, намусым кушмый!

29 август 2018

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Юлия НАСЫЙБУЛЛИНА
Фото: Солтан Исхаков
"Интертат" электрон газетасында Татарстанның халык артисты Зөһрә Сәхәбиеваның җырчы Филүс Каһировка булган шелтәсе турында материал чыкканнан соң, укучыларыбыздан, социаль челтәрләрдә безне күзәтеп баручылардан күп фикерләр килде - берәүләр Зәһрә ханымның теләге дөрес дип саный, икенчеләр исә аңа катгый каршы чыга. Исегезгә төшерик: Зөһрә Сәхәбиеваның шелтәсе Филүс Каһировның Хәйдәр Бигичев җырларын рөхсәтсез җырлавына риза булмавыннан гыйбарәт. "Аның җырларын кабатларга кирәкми, Хәйдәр Бигичевнең үзен тыңласыннар", - дигән иде ул "Интертат" электрон газетасына биргән интервьюсында. Инде Татарстанның атказанган артисты Филүс Каһировның да бу шелтәгә карата фикерен сорадык.

- Филүс, сез ретро җырларны яздырып дисклар чыгарган вакытта һәм җырны сәхнәдән башкарганда аның кем репертуарыннан булуын әйтәсезме?

- Аудиодисклар, альбомнар чыгарганда, җырның кем репертуарыннан булуын күрсәткәнем юк. Әйтик, "Китмә, сандугач" җырын гына алыйк. Рөстәм Яхин көе, Гөлшат Зәйнәшева сүзләре дип язганнан соң, җәя ачып Илһам Шакиров, Хәйдәр Бигичев, Рөстәм Маликов, Георгий Ибушев репертуарыннан дип һәрберсен атап язып булмый бит инде?! Концертларымда мин сәхнәдән башкарган җырларның кем репертуарыннан булуын һәрвакыт әйтәм. Тамашачылар шаһит. Халык җырлары, ретро җырлар, классик әсәрләр - татар сәнгатенең байлыгы ул. Аларны башкарыр алдыннан кемнән дә булса рөхсәт сорау кирәк дип санамыйм.

- Сез Зөһрә Сәхәбиева белән нинди мөнәсәбәттә?

- Зөһрә апа белән начар мөнәсәбәттә булганым юк. Аның белән тәүге тапкыр күрешкән көнне әле дә хәтерлим. "Энем, мин синең җырлаганыңны күрдем. Хәйдәр абыеңның тавышын ишеткән кебек булдым, рәхмәт. Киләсе очрашуга Хәйдәрнең язмаларын да алып килермен", - диде. Икенче тапкыр Зөһрә апа белән радиода күрештек. Ул анда миңа Хәйдәр абыйның дискларын бирде. "Хәйдәр абыеңны тыңла. Аның җырлары, җырлавы һәрвакыт югары дәрәҗәдә булды. Алга таба да шушы юнәлештә иҗат итәргә тырыш, юлыңнан тайпылма", - диде. Зөһрә апа кебек зур җырчыдан шундый җылы сүзләр ишеткәч, мин, әлбәттә, канатланып китеп шул җырларны җырларга тотындым. Тик, кызганыч, күптән түгел генә басылып чыккан интервьюсындагы сүзләренә төшенә алмадым. Ни өчен ул үпкәсен үземә турыдан-туры шалтыратып әйтмәде икән? Әлегәчә бу сорауга җавап таба алганым юк...

- Әңгәмәне укыганнан соң Зөһрә Сәхәбиева белән үзегез элемтәгә кермәдегезме?

- Юк. Дөресен генә әйткәндә, мин әлегә нәрсә дип сүз башларга белмим.

- Ә бит кайчан да булса сезгә күзгә-күз очрашырга туры киләчәк...

- Һичшиксез, без күрешәчәкбез һәм сөйләшәчәкбез. Иң мөһиме, мин аңа үпкәләмим дә, рәнҗемим дә. Зөһрә Сәхәбиеваны бик хөрмәт итәм. Аның татар сәнгатенә керткән өлеше гаять зур.

- Гаебең булмаса да гафу сорап, үзара аңлашып алу комачауламас иде кебек. Сез ничек уйлыйсыз?

- Дөрес, килешәм. Без барыбыз да татар җыр сәнгате казанында кайныйбыз. Дошманлашып яшәү матур түгел, ул кешене бизәми. Үзем кешегә үпкә саклап, рәнҗеп яши алмыйм, намусым кушмый...

Бу темага Рәшит Сабиров фикерен дә укыгыз: "Зөһрә ханым, Филүс синең улыңмы әллә, рәнҗергә?" - Татарстанның халык артисты Рәшит Сабировның Зөһрә Сәхәбиева сүзенә җавабы


  Без Инстаграмда

Фикерләр








Шоу-бизнес

"Мәшәкать бүләк итәм", "Романтик аш белән сыйлыйм", "Ураза тотам". Шоу-бизнес вәкилләре гашыйклар көнендә сөйгәннәрен ничек куандыра?

Бүген "Изге Валентин көне" - гашыйклар көне билгеләп үтелә. Кемдер өчен ул бәйрәм, кемдер өчен сөйгәннәрен тагын бер тапкыр искә ала торган көн, ә кайберәүләр аны бөтенләй кире кага.“Интертат” шоу-бизнес өлкәсендәгеләрнең фикерләрен туплады.

Шоу-бизнес

Тәслимә Низами: “Мин бит бер генә дә нота белмим, мин – тумыштан талантлы кеше”

Татарстанның атказанган артисты, шагыйрә, күренекле композитор, журналист Тәслимә Низами Татарстан Милли китапханәсенең Зур уку залында үзенең “Җырым белән керәм күңелеңә” дип исемләнгән иҗат кичәсен үткәрде. Анда ул үзен, беренче чиратта, шагыйрә буларак тәкъдим итте һәм, әлбәттә, тамашачы яратып өлгергән җырларын да башкарды. “Татар-информ” хәбәрчесенә ул хәзер нинди темаларга иҗат иткәнен, Иван белән булган мөнәсәбәтләре турында сөйләде һәм укучыларга төпле киңәшләрен бирде.

Шоу-бизнес

Айваз Садыйров радио тамашачыларын "Макдоналдс" системасы буенча сыйлый: "Продукт күп булмагач, тамашачыга да җиңел!"

Танылу ирекне чиклиме яисә, киресенчә, ярдәм итәме? Әлеге сорау белән мин “Татар радиосы”ның баш мөхәррире Айваз Садыйровка мөрәҗәгать иттем. Танылмаган шәхес түгел, шулай бит? Тугызынчы сыйныфта укыганда ул беренче интернет-радиостанция ача. Бүгенге көнне дә татар радиолары арасында беренчеләрдән булган радионы җитәкли. 

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла