«Җәбирдән (Аллаһ аннан разый булсын) риваять кылына: Расүлүллаһ (аңа Аллаһның сәләме һәм рәхмәте булсын иде) болай диде:

«Мөэмин җанга якын һәм күңелгә ятышлы кеше ул. Кешеләрнең йөрәкләренә якын булмаган һәм күңелгә ятышлы булмаган кешедә хәер юк. Ә кешеләрнең иң хәерлесе башкаларга иң файдалы булганы ул». Табарани, «Могҗәм әл-әусат», 5787

Аңлатма:

Хәдистә يَأْلَفُ وَيُؤْلَفُ дип әйтелә - татар телендәге өлфәт сүзенең гарәпчәсе. يَأْلَفُ - үзе җанга ятышлы, якын булган кеше, ә يُؤْلَفُ башка кешеләрнең күңелендә бу кешегә карата якынлык, җылылык уянган адәм.

Кешеләр белән җиңел уртак тел таба алучы, аның белән аралашу җиңел, рәхәт булган кешене аңлата.

Әлбәттә, мөселман кешесе шундый - ачык, матур итеп сөйләшә белүче, үз янында күңелләрдә сөенү, шатлык уяткан кеше булырга тырышырга, омтылырга тиеш.

Раббым! Безне шундый - Синең иң хәерле бәндәләреңнән әйләсә идең.  

https://t.me/tathadisler