عَنْ أَبِي سَعِيدٍ الْخُدْرِيِّ رضي الله عنه: «أَنَّ نَاسًا مِنَ الْأَنْصَارِ، سَأَلُوا رَسُولَ اللهِ صلى الله عليه وسلم فَأَعْطَاهُمْ، ثُمَّ سَأَلُوهُ فَأَعْطَاهُمْ، حَتَّى نَفِدَ مَا عِنْدَهُ، فَقَالَ: مَا يَكُونُ عِنْدِي مِنْ خَيْرٍ فَلَنْ أَدَّخِرَهُ عَنْكُمْ، وَمَنْ يَسْتَعْفِفْ يُعِفَّهُ اللهُ، وَمَنْ يَسْتَغْنِ يُغْنِهِ اللهُ، وَمَنْ يَتَصَبَّرْ يُصَبِّرْهُ اللهُ، وَمَا أُعْطِيَ أَحَدٌ عَطَاءً خَيْرًا وَأَوْسَعَ مِنَ الصَّبْرِ
Мәдинә сәхәбәләреннән бер төркем кешеләр Аллаһ илчесеннән салләллаһү галәйһи вә сәлләм күпмедер (мал) сорадылар, һәм ул аларга бирде.
Бераздан тагын сорадылар, ул аларга бирде, күпмедер вакыттан тагын сорадылар, һәм ул аларга үзендәге бөтен мал беткәнчегә хәтле бирде, һәм әйтте:
«Минем кулыма ни генә эләксә дә, мин аны сездән яшермәм (, ә садака итеп сезгә бирермен). (Әмма шуны истә тотыгыз):
- Кем тыйнак булырга тырышса, Аллаһ аны тыйнак итәр,
- Кем үз көченә таянып, тырышлык куеп эшләсә, Аллаһ аны (башкаларга мөрәҗәгать итү кирәгеннән) коткарыр,
- Кем сабыр булырга тырышса, Аллаһ аңа сабырлык бирер.
Сабырлыктан да хәерлерәк һәм олырак бүләкне беркемнең дә алганы юк әле»
Сахих Бохари, 1469