Сүрәне Камил хәзрәт Сәмигуллин укый (гарәпчә)

Сүрә тәфсирен Илдар Кыямов укый

Рәхимле һәм шәфкатьле Аллаһ исеме белән!

1. [Кяферләрнең рухларын] Көч белән йолкып алучылар [фәрештәләр] белән ант итәмен.

2. [Мөэминнәрнең рухларын] Җиңел итеп чыгаручылар белән дә.

3. Йөзеп йөрүчеләр [фәрештәләр] белән дә.

4. Ярыша-ярыша [бер-берсен] узышканнар [фәрештәләр] белән дә.

5. Һәм [колларга бәйле] эшне үтәүчеләр [фәрештәләр] белән дә! [Һичшиксез, терелтеләчәксез!] [1]

6. Тетрәгәннең [беренче мәртәбә сурга өрүдән соң, һәрнәрсә] хәрәкәткә киләсе көнендә [барыгыз бергә үтереләчәксез].

7. Артыннан килгән һәрнәрсә дә аңа иярәчәк [сурга икенче мәртәбә өрелгәннән соң барыгыз бергә терелтеләчәксез].

8. Ул көнне йөрәкләр тетрәячәк.

9. Аларның карашлары түбән төшкән хәлдә.

10. [Болар көләр өчен] Әйтәләр [иде]: «Чыннан да, без [үлемебездән соң терелтелеп] элекке хәлгә кайтарылачакбызмы?

11. Без черегән сөякләр булганнан соң [терелтеләчәкбезмени]?»

12. Алар [мыскыл итеп] әйттеләр: «Алай булгач, бу – бик зарарлы бер кайту!»

13. Ул – [сурга икенче кат өрү белән, мәйданга киләчәк] бер көчле тавыш кына.

14. Менә алар – тип-тигез җир өстендә [хисапка тартылуны көтеп торган тере кешеләр]!

15. [Расүлем!] Мусаның [галәйһиссәлам] хәбәре сиңа ирештеме?

16. Менә Раббысы аңа мөкатдәс үзәнлек булган Тубада мөрәҗәгать итте.

17. «Фиргавенгә бар [да Миңа коллыкка дәгъват ит]! Һичшиксез, ул азынды.

18. Әйт: «Сиңа [ширектән һәм гөнаһтан] арынырга кирәк түгелме?

19. Сине Раббыңа һидаять итим дә, шул сәбәпле, [Аңардан] хөрмәт белән куркырсың».

20. Ул аңа [таягының аждаһага әверелүе кебек] бөек бер аять [һәм могҗиза] күрсәтте.

21. Әмма ул [бу могҗиза Аллаһтан булганын] ялган дип санады һәм каршы төште.

22. Шуннан соң [курку белән] качып, [Мусага [галәйһиссәлам] аркасы белән борылды.

23. Ул [бөтен сихерчеләрне һәм гаскәрен] туплады һәм мөрәҗәгать итте.

24. Һәм әйтте: «Сезнең бөек Раббыгыз – мин!»

25. Аллаһ аны Ахирәттә дә, дөньяда да гыйбрәт бирерлек бер җәзаландыру белән тотты.

26. Һичшиксез, монда [Аллаһтан] курыккан кешеләр өчен гыйбрәт бар.

27. [И, терелүне инкяр итүчеләр!] Яралтылу өчен сезме кыенрак, күкме? Аны Ул бина кылды.

28. Гөмбәзен биек итте һәм аны [ярыксыз] корды.

29. Төнен караңгы итте, көндезен дә [уртага] чыгарды.

30. Җирне Ул моннан [күкнең яратылышыннан] соң [Мәккәдән башлап] түшәде.

31. Шуннан соң суын һәм утлавын чыгарды.

32. Тауларны да. Ул аларны какшамас итте.

33. [Менә болар] Сезнең һәм терлек-туарыгызның файдасына [эшләнде].

34. Бөек бәла [булган Кыямәт сәгате] җиткәч.

35. Кешенең [чамасыз гафләте сәбәпле оныткан гамәлләре күрсәтелеп, дөньяда] нәрсә өчен көч куйганы исенә төшәчәк көнне.

36. Ут, күрә алганнар өчен, [һич яшерен калдырылмыйча] күренәчәк.

37. Кем чиктән ашса.

38. Һәм [шәһвәтләренә ияреп] дөнья тормышын [Ахирәтнекеннән өстен тотып] сайласа...

39. Һичшиксез, [мондый кяфер өчен] сыеныр урын [дөрләп янган] Ут [булыр].

40. Кем исә Раббысының хозурында басып торудан курка һәм [бертуктаусыз начарлыкка әмер иткән] нәфесен начар теләкләрдән тыя.

41. Һичшиксез, [мондый кеше өчен] сыеныр урын җәннәт [булыр].

42. [Расүлем!] Синнән Сәгать турында сорыйлар: «Ул кайчан җитәчәк?»

43. Нигә аны сиңа искә алырга?

44. Аның [белән бәйле белемнең] ахыры – синең Раббыңда.

45. Син бит [кешеләргә Кыямәтнең вакытын әйтер өчен җибәрелмәдең] фәкать аңардан курыкканнар өчен кисәтүче генә.

46. Алар аны күрәсе көнне [газапның катылыгына һәм вакытның озынлыгына шаһит булгач] үзләрен бер төштән соң яки төшкә кадәр генә [дөньяда] торган дип санарлар.