Сүрәне Камил хәзрәт Сәмигуллин укый (гарәпчә)

Сүрә тәфсирен Илдар Кыямов укый

Рәхимле һәм шәфкатьле Аллаһ исеме белән!

1. И, [беренче вәхи килгәч, киеменә] төренгән [Расүлем]!

2. Төнне уяу үткәр, бик азыннан кала.

3. Яртысын [уяу уздыр] яки аннан да бераз кимет [тә, өчтән берен намазда үткәр].

4. Яки аңа өстә [һәм өчтән икесен гыйбадәттә үткәр]. Коръәнне тәртил белән [әкрен-әкрен, ачык итеп] укы.

5. Без тулысынча сиңа [һәркем җиңел генә аңлый алмаслык] авыр [әһәмиятле] бер сүз җибәрәчәкбез.

6. Һичшиксез, төнлә кыямда булган кеше [йөрәк белән тел] ярашу ягыннан көчлерәк, уку ягыннан да дөресрәк.

7. Һичшиксез, син көндез бик озак мәшгуль буласың [һәм гыйбадәтеңә тиешенчә игътибар итә алмыйсың, шуңа күрә төннәреңне Раббыңа гыйбадәткә бүл].

8. [Намаз укып, Коръән укып, тәһлил кебек зикерләр белән] Раббыңның исемен зикер ит һәм [игътибарыңны Раббыңнан башка һәрнәрсәдән] тулысынча өзеп, Аңа гына багышла.

9. Көнчыгышның һәм Көнбатышның Раббысы, Аннан башка һичбер илаһ юк. Шулай булгач, Аны [һәр эшеңдә] бер Яклаучы ит.

10. Аларның [Минем һәм синең хакта] сөйләгән [мәгънәсез һәм ялган] нәрсәләренә сабырлы бул һәм [аларның һәр кыланышларына җавап бирү юлына басма, ихтыярлы бер шәкелдә] аларны күркәмлек белән кире как.

11. Мине нигъмәт ияләре булган ялганчылар белән калдыр һәм аларга [Бәдер көненә кадәр] аз гына [бервакытка] кичектерү бир [чөнки сине мыскыл иткән Корәеш мөшрикләренә ул вакыт Мин җитәрлек булачакмын].

12. Һичшиксез, Безнең хозуры-бызда [кяферләрне җәзалау өчен] богаулар һәм Ут бар.

13. Һәм [ут чәнечкеләре һәм зәкъкум агачы кебек] тамакка тыгыла [ашказанына да үтми, тышка да чыкмый] торган ашамлык һәм тилмерткеч газап бар.

14. Ул көнне җир һәм таулар терәячәк һәм [биеклектә үрнәк булган] таулар чәчелә торган ком өеме булачак.

15. [И, ахыр заман өммәте!] Һичшиксез, Без фиргавенгә илче җибәргәнебез кебек, сезгә дә шаһит итеп бер расүл җибәрдек.

16. Фиргавен илчегә каршы төште, һәм Без аны бик каты бер тотып алу белән тотып алдык.

17. [И, кешеләр!] Әгәр дә [дөньяда] кяфер булсагыз, балаларны чал чәчле [карт кебек] итәчәк көннән ничек котылырсыз?

18. Күк [хәтта] ул көнне [дәһшәттән] ярылачак. Аның [Аллаһы Тәгаләнең] вәгъдәсе тулысынча үтәләчәк.

19. Һичшиксез, бу – [эчләренә янауларны алган аятьләр] үгет. [Һидаятьне табарга] Теләгән [иман һәм итагать белән] Раббысына таба бер юл тотар.

20. Һичшиксез, синең Раббың белә: син [үзеңә әмер ителгәнчә хәрәкәт итеп, кайчак] төннең өчтән икесеннән азрак бервакытны, [кайчак] яртысын һәм [кайчак] өчтән берен [тәһәҗҗүд белән] үткәрәсең, синең белән бергә булган кешеләрдән бер өлеше дә [шулай итә]. Төнне һәм көнне Аллаһ тәкъдир итә. Ул [Аллаһы Тәгалә] сезнең моңа [төн буена гыйбадәткә] көч җиткерә алмаячагыгызны белә, шуңа күрә тәүбәгезне кабул итте. [Намазларда] Коръәннән үзегезгә җиңел килгәнне укыгыз. Ул [Аллаһы Тәгалә] белә: арагызда авырулар булачак, башкалар Аллаһның фазылыннан [ризык яки гыйлем] эзләгән хәлдә җирдә сәфәргә чыгачаклар, башкалар исә Аллаһ юлында сугышачаклар [һәм таңга кадәр гыйбадәт кылырга көч тапмаячаклар]. Шулай булгач, [намазларда] аннан үзегезгә җиңел булганны укыгыз, [фарыз] намаз укыгыз, зәкят бирегез, [бурыч сораучыга рибасыз акча бирү кебек] яхшы нәрсәне Аллаһка бурычка бирегез. Игелектән үзегез өчен [Ахирәткә дип] нәрсә әзерлисез, Аллаһ хозурында шуны [дөньяныкы белән чагыштырганда] яхшырак һәм савап ягыннан артыграк табачаксыз. Аллаһтан ярлыкау сорагыз. Һичшиксез, Аллаһ –Гафу итүче, Рәхимле.