Сүрәне Камил хәзрәт Сәмигуллин укый (гарәпчә)

Сүрә тәфсирен Илдар Кыямов укый

Рәхимле һәм шәфкатьле Аллаһ исеме белән!

1. [Расүлем!] Раббыңның фил ияләренә ни кылганын күрмәдеңме?

2. Ул аларның [Кәгъбәне җимерү] хәйләсен бушка чыгармадымы?

3. Аларның өсләренә көтү-көтү кошлар җибәрмәдеме?

4. Алар [кошлар] аларга яндырылган балчыктан ташлар аталар иде.

5. Ул [Аллаһы Тәгалә] аларны [бөҗәкләр тарафыннан] ашалып беткән иген яфраклары кебек итте.[1]

[1] Йәмән хөкемдары Әбрәһә Сангада бер потханә төзеткән һәм Мәккәгә йөргән хаҗиларны шуңа хаҗ кылдырмакчы булган. Кинанә кабиләсеннән бер кеше шул чиркәү эченә кереп, анда ут төртеп янгын чыгарган. Моңа бик ачуы чыккан Әбрәһә фил гаскәре белән Мәккәгә таба юлга чыккан. Бу вакыйга Расүлуллаһның (салләллаһу галәйһи вә сәлләм) тууына илле көн кала мәйданга килгән, һәм аның киләчәгенә бер ишарә дә булган. Аллаһы Тәгалә, бу сүрәдә белдергәнчә, Әбрәһәне бөтен гаскәре белән һәлак иткән.