Журналист Алмаз Гафиятов ТНВдан киткән
Алмаз Гафиятов «Ак Барс» хоккей клубы матбугат хезмәтендә эшләячәк.
Журналист Алмаз Гафиятов эш урынын алмаштырган. Ул ТНВдан киткән.
«ТНВда 13 ел! Меңләгән спорт трансляцияләре, репортажлар, сюжетлар, туры эфирлар... Корреспондент, алып баручы, комментатор, баш редактор булып та эшләдем. «Новости», «Хәбәрләр», «Батырлар» тапшыруы, «Спорт Тайм» авторлык тапшыруым, «Таяну ноктасы» ток-шоуы. Беренчеләрдән булып, региональ телевидениедә татар телендәге хоккейны башлап җибәрдек. Соңгы 10 ел эчендә ТНВда эфир вакыты күләме буенча абсолют рекорд. Бу – бик шәп вакыт иде! Янымда булучыларга рәхмәт. Алга барабыз!» – дип язган Алмаз социаль челтәрендә.
Без Алмаз белән элемтәгә кердек.
«Китүемнең сәбәбе – яңа эш урынына күчү. Хәзер «Ак Барс» хоккей клубы матбугат хезмәтендә эшләячәкмен.
13 ел элек килгәннән соң, телевидение эшчәнлегенең барлык этапларын үттем. Корреспондент, комментатор, спорт редакциясе җитәкчесе, алып баручы булдым. Күп кенә тапшыруларда эшләдем», – ди «Интертат» хәбәрчесенә Алмаз.
Бу яңалыкны күрүчеләр Алмазга уңышлар теләгән, аның эшчәнлеген мактаган.
«Таяну ноктасы» тапшыруын Альберт Шакиров һәм Луиза Закирова алып барачак.