Зур тизлектә килгән Mercedes-Benz кешеләрне бәрдергәнен видеокамералар төшереп алган
Исерек йөртүче аркасында бер хатын-кыз урында ук үлгән, икенчесе җитди имгәнгән.
5 августта Мәскәүнең Батайский юлында иномарка кешеләрне таптаган. Бу аварияне күзәтү камералары төшереп алган. Әлеге кадрларны «Вести» каналы күрсәтте.
Видео кадрларыннан күренгәнчә, ике хатын-кыз «зебра» буйлап юл аша чыгып бара. Шул чакта Mercedes-Benz E320 машинасы килеп чыга. Иномарка зур тизлектә килеп, хатыннарны бәрдереп китә.
40 яшьлек хатын урында ук һәлак була. Аның белән бергә булган хатынны хастаханәгә алып китәләр, ул бик җитди имгәнгән.
Соңрак хокук саклаучылар ачыклаганча, авария ясаган иномарка белән 43 яшьлек ир-ат идарә иткән. Ул Мәскәүдә яши һәм беркайда да эшләми. Авария вакытында ул исерек булган. Хәзер бу кешегә карата җинаять эше ачылган.
