Татарстанның халык артисты бүген гомер бәйрәмен каршылый.
Туган көне уңаеннан Зөлфия ханым социаль челтәрдәге сәхифәсендә бәләкәй чагындагы аклы-каралы фотосын куеп, болай дип язган:
« – Сезнең балагыз туды!
Әти:
– Малай?!!!
– Юк!
– Ә кем???» – дип әтисе белән булган мәзәк хәлне искә алган ул.
«Ә чынлыкта мин әтинең яраткан кызы», – дигән артист.
Виртуаль дуслары аңа изге теләкләрен, җылы сүзләрен ирештергәннәр. Исәнлек, иминлек, гаилә бәхете, иҗади уңышлар теләгәннәр.
Берәү исә Зөлфиянең кечкенә вакытта төшкән сурәтенә карап, нәни Зөлфиянең чәчләре бик сирәк булуына ишарәләп: «Ул бантик нәрсәгә эләгеп тора икән?» – дип көлгән.
«Ул тасма тарихы бик кызык. Әнинең миңа аны тагып фотога төшерәсе килгән. Ә мин аны әллә ничә тапкыр атып бәргәнмен. Менә бантик минем башымда ятып торган мәлне тиз генә тотып алганнар. Чәчкә эләкмичә генә», – дип хатирәләре белән уртаклашкан артист.
Зөлфия ханымны без дә туган көне белән тәбриклибез. Барлык изге теләкләргә кушылабыз.
