Зөлфия һәм Җәвит Шакировлар «Туган тел» телеканалы өчен эксклюзив әңгәмә биргән. Журналист иҗади пардан озак еллар бергә дус-тату яшәүләренең сере белән кызыксынган. Видео социаль челтәрләрдә чыкты.
Журналист: «Җәвит абый, Зөлфия апа, сезнең менә сәхнәдә дә, сәхнә артында да мәхәббәт. Ничек шулай яшәп була ул?»
Җәвит Шакиров: «Без аны борычлап, тозлап куйдык. Ул бозылмый».
Зөлфия Шакирова: «Консервировать итеп куйдык. Яши башлаганыбызга 35 ел инде. Ә 35 ел ул 70 ел. Яки Җәвит белән бер ел яшәү үзе ике елга тиң. Тагын бер 70не түзсәм, Аллаһы боерса.
Җәвит Шакиров: «Түзсәм ди, ә үзенең әле яшисе килә минем белән».
Журналист: «Зөлфия апа, әйдәгез, Җәвит абыйның өстенлекләрен түгел, кимчелекләрен тамашачыларга сөйләп үтик әле. Җәвит абый үпкәләми ул, мин аны беләм».
Зөлфия Шакирова: «Җәвит абыеңның бер генә кимчелеге бар – йоклаганда гырлый. 35 ел инде оркестр астында йоклыйм».
Җәвит Шакиров: «Беләсеңме ни өчен гырлыйм, хатын-кызның көндез күп сөйләшүенә компенсация ул гырлау».
