Казанның аш-су остасы Башкортстан блогеры Рөстәм Нәбиевка үзе пешергән чәкчәкне тапшырган
Казанда яшәүче татар халык ашларын 30 елдан артык пешерүче, 5нче разрядлы кондитер-технолог Зөлфия Идрисова Башкортстан блогеры, соңгы вакытта ике кулында иң биек тауларга менүче буларак танылган Рөстәм Нәбиев өчен махсус чәкчәк пешергән.
Рөстәм Нәбиевнең Казанга килгәнен туры китереп, Зөлфия ханым махсус пешергән чәкчәген тапшырып та өлгергән.
Фото: © Рөстәм Нәбиевның социаль челтәрдәге битеннән
Зөлфия ханым чәкчәкне Рөстәм менгән тау исемнәре (Эльбрус, Манаслу, Килиманджаро һ.б.) язылган әләмнәр белән бизәгән, иң югарыга блогерның сынын һәм ул хезмәт иткән Һава десанты гаскәрләре әләмен куйган.
«Минем мотиваторым өчен бүләк. Рөстәмгә сокланам. Бу видеода чәкчәк пешерү процессы да бар», – дип язган аш-су остасы.
Рөстәм Нәбиев бүләкне социаль челтәрләрдә күреп, аш-су остасына рәхмәтен белдергән иде. «Зөлфия апа, һуш китмәле булган бит бу. Бик зур рәхмәт сиңа», – дип җавап язган ул.
Социаль челтәрдән кулланучылар аш-су остасы Зөлфия Идрисованың «алтын куллы» булуына сокланган.