Зөлфирә Шәйдуллинаның әнисенә шушы көннәрдә 50 яшь тулган. Зөлфирә ире Алмаз Мирзаянов белән бергә кадерле кешесенә сюрприз ясаганнар.
– Әниебез, юбилейны үткәреп тормыйбыз, диде. «Тиздән катлаулы операция булырга тора, бөтенләй туган көн кәефе юк миндә, балалар», – дип әйтте. Оныклары, балалары белән генә берәр кафега барырга көчкә күндердек. Ризалашты.
Ә безнең сюрприз ясыйсы килде. Аңа, балалары белән генә утырып алабыз, дип әйттек тә, ә үзебез бөтен якын туганнарны чакырдык. Башта алар күршедәге залда качып тордалар. Бергә фотога төшәргә җыенганда, әнигә сиздермичә генә, без аларны чакырдык. Әни үзенең артына туганнар да килеп кушылганын белмәде. Тыныч кына килеп басканнары өчен кунакларга зур рәхмәт. Барысы да ничек булырга тиешлеген 5 минут элек кенә аларга аңлаткан идек. Фотограф фотоаппаратыннан фотоны килеп күрсәткәч кенә, әни туганнарны сурәттән күреп алды (әле анысын да икенче тапкырдан гына). Шок! Кунакларның да, әнинең дә күзләренә яшьләр килде. Еладык та, көлдек тә...
Әниебезгә күңелле бәйрәм ясарга үз өлешен керткән барча туганнарыбызга, дусларыбызга зу-у-ур рәхмәт! Әле тагын бик күп юбилейларны бергә уздырырга насыйп булсын! – дип язган Зөлфирә социаль челтәрдәге сәхифәсендә һәм юбилейның шул мизгеленнән видео белән уртаклашкан.
«Елаттыгыз», «Кат-кат карадым. Ничек матур бәйрәм ясагансыз», «Афәрин! Әниегезне шулай сөендергәнегез өчен», «Шәп идея!», «Әниегезнең операциясе дә уңышлы булсын, исән-сау терелеп, сезнең янәшәдә шатланып, куанып, хәерле гомер кичерергә насыйп булсын», – дип язганнар Зөлфирәнең виртуаль дуслары.
Бу теләкләргә без дә кушылабыз. Җырчының әнисенә сәламәтлек, күңел тынычлыгы, озын гомер теләп калабыз.
Видео: Зөлфирә Шәйдуллинаның шәхси аккаунтыннан