Иҗади гаилә Зөлфирә Шәйдуллина һәм Алмаз Мирзаяновлар тиздән әти-әни булачак. «Күңел» радиосы оештырган «Безнең яшьлек җырлары» концертында бик күпләр Зөлфирәнең инде матур гына булып түгәрәкләнеп килүенә игътибар иткәндер. Аның бәби алып кайтырына да күп вакыт калмаган дип фаразларга була, чөнки ноябрь аеннан Мирзаяновларның концертлары көчле тавышлы Зөлфирәдән башка гына узачак. Алмаз быел үзенең шәхси сольникларын оештыра.
Шунысын да әйтергә кирәк, Зөлфирә дә, Алмаз да сөенечле хәбәрләрен башкалар кебек социаль челтәрләрдә зурлап хәбәр итүне кирәк санамады. Бу турыда комментарий сорап шалтыраткач, яшьләр «әлеге тема ябык, бәби турында сөйләшмибез» дип белдергән иде. Алай да Зөлфирә кеше күзеннән качмады, бөтен концертларда рәхәтләнеп бии-бии чыгыш ясады.
Зөлфирә белән Алмазны тормышларындагы зур, шатлыклы вакыйга белән тәбрик итәбез. Зөлфирәгә бәбине җиңеллек белән күтәреп, исән-сау алып кайтырга язсын.