Үзизоляция чорында онлайн туйлар үткәрелә башлады
Беренче онлайн туйларга Уфада старт бирелде.
Уфалылар Вахит һәм Лилия үзизоляция режимында яңа форматта туй үткәргәннәр. Тыйнак итеп уздырылган туйны смартфон экраннары аша туганнары да күзәткән, яшьләргә матур теләкләрен җиткергәннәр, бүләкләрен дә онлайн форматта җибәргәннәр. Туйның кунакларына алып баручы флешмоб үткәргән. Җиңүчеләргә яшьләрдән бүләк — токмач һәм бәдрәф кәгазе. Җиңелүчеләр битлектән утырырга мәҗбүр булган. Хәтта булачак сабыйларына дип, акча да җыйганнар, малай өчен кияү картасына, кыз өчен кәләш картасына, игезәкләр тууын теләүчеләр алып баручының картасына акча җибәрергә тиеш булган.
«Үзизоляция шулай итә ул», — дип көлгәннәр инстачылар.
