Зинира һәм Ризат Рамазановларга «Татарстанның атказанган артисты» дигән мактаулы исем бирелгән. Әлеге бүләкне алар Татарстан Рәисе Рөстәм Миңнеханов кулыннан алганнар. Бу хакта җырчылар үзләренең социаль челтәрдәге сәхифәсендә хәбәр итә.
«Рәхмәт, хөрмәтле тамашачыларыбыз! Илләребез тыныч, күкләребез аяз булсын. Лаеклы исемнең медален тапшыру тантанасы», – дип язалар алар видео янында.
Сәхнәдәш дусларыннан җырчылар бик күп тәбрикләү сүзләре кабул иткән. Барысы да җырчыларның куанычын уртаклаша. Ә менә Рамазановларның хейтерлары бик усал, дигән фикер кала.
«Башка профессия кешеләренә бик сирәк бирелә бу исем. Әйтерсең артистлар – Аллаһның кашка тәкәләре. Барысына да рәттән бирәләр. Соңгы елда кемгә атказанган механизатор, сыер савучы яки укытучы исеме бирделәрме икән?»;
«Дилә Нигъмәтуллина бишенче дистәне ваклап бара. Атказанган исеме юк. Бу ни инде?»;
«Илмира Нәгыймова күптән җырлый, аңа күкрәк билгесе генә бирделәр. Мин шокта. Бу гадел дип саныйсызмы? Нигә Мәдәният министрлыгында шундый тәртипсезлек?»;
«Нишләп артистларны гына зурлыйлар? Үлсәләр, зурлап күмәләр. Табибларны, укытучыларны күрмиләр дә», – дип язалар кайберәүләр.
Узган елның көзендә Рамазановларга «Башкортстанның атказанган артисты» дигән исем дә бирелгән иде.