Зинира һәм Ризат Рамазановлар икенче балага заказ биргән?
«Татар-информ” хәбәрчесе бер концерт вакытында Рамазановлардан икенче бәби алып кайту-кайтмау планнары хакында сорашты.
– Айгизәгә иптәш алып кайту теләге бар инде ул, - ди Ризат.
– Алла боерса, - дип өстәп куя Зинира аңа.
– Әлегә бит концерт программасы әзерләнгән, аңа күп көч түгелде бит инде. Шуңа күрә сезонны эшләп бетерергә кирәк, - дип аңлатты Ризат.
– Айгизәгә иптәш кирәк дибез инде, ул баштарак бик интекте, әле хәзер ияләнеп бетте генә, – ди Зинира.
Аңа Ризат кушылды:
– Айгизә хәзер “собственница” булды, бик каты көнләшә. Мин ваннада теш чистартканда, “Матурым, утны гына яндыр әле”, дисәм, уйнаган җиреннән чыга да: “Әтием, син миңа әйттеңме матурым?” - дип сорый.
Башка артистларның концерт сезоны сентябрьдән майга кадәр дәвам итә. Ә Рамазановларның гыйнвардан декабрьгә кадәр бер сезон бара. Аларның концертлары Татарстанда Яңа елдан соң гына башлана. Димәк, Айгизәгә иптәшне кайчан көтәргә соң? Бергәләп санап чыгарыйк!