«Сәүдә үзәгендә йөри идек, бер узып баручы ир-атка шалтыраталар. Ә «звонок»та безнең «Яратасым килә үзеңне» җыры куелган. Ризат абыйны туктатты да, телефонын сорап алып, сөйләшә башлады. Яңа танышыбыз Илдус абый белән тормыш иптәшенә чакыру билеты бүләк иттек. Абыйның ничек шатланганын белсәгез», – дип уртаклаша социаль челтәрдәге сәхифәсендә Зинира Рамазанова.
Бу вакытта ир-атка хатыны шалтыраткан булган. «Шәп ир, одеколон исләре килеп тора. Абыйны ташламагыз, бергә булыгыз», – ди Ризат, яңа танышының хатыны белән телефоннан сөйләшкәндә.
«5 бала булгач ничек ташласын инде?» – дип, җырчыларның яңа танышы бераз аптырап та куя.
Халык артистларның бу гамәлен хуплаган һәм бәхет елмайган абый өчен дә шатланган: «Супер молодецлар! Шулай кешелекле булып, кеше күңелен дә күрә белергә кирәк», «Ир-ат балалардан да артык куана».
