«Зинһар, исән кайтыгыз»га көй язган Илназ Баһ Бөтенроссия конкурсында лауреат булган

Татарстанның атказанган җырчысы Илназ Баһ Башкортстан Республикасы Уфа шәһәрендә «Время Героев» патриотик җырлар III Бөтенроссия ачык конкурсында беренче тапкыр композитор буларак катнашты. Ул бәйгедә «Зинһар, исән кайтыгыз» җырын тәкъдим итте.

Җырның сүзләрен Альбина Рәҗәп язган. Барлыгы 300 гариза килгән булган.

«15 төбәктән 36 катнашучы ярымфиналга чыкты. Илназ өченче дәрәҗә лауреат булды, аңа акчалата сертификат һәм бүләк тапшырылды. Котлыйбыз! Молодец, без синең белән горурланабыз», – дип язган тормыш иртәше Гүзәл Идрисова социаль челтәрдәге сәхифәсендә.

Илназ Баһның иҗатын яратучылар күпсанлы котлауларга кушыла.