Мәетләрне, машинаны кисеп, 3 сәгать чыгарганнар: 9 кешенең үлеменә китергән юл һәлакәте

25 гыйнвар көнне Тула астындагы «Калуга – Тула – Михайлов – Рязань» трассасында («Алтын Боҗра» Р-132 трассасы) Ленин районының Алешня авылы борылышында фура һәм Volkswagen Transporter микроавтобусы бәрелешкән. Соңгысының номеры Курск өлкәсенә карый. Бу хакта «tula.aif.ru» сайтында Антонина Афанасьева һәм Юлия Богомолова хәбәр итә.

Нәрсә булган?

Дәүләт автоинспекциясенең төбәк бүлеге мәгълүматларына карганда, Volkswagen Transporter каршы як полосага чыккан һәм цистерналы йөк машинасына бәрелгән. Дәлилләнмәгән мәгълүматлар буенча, микроавтобус юлдан зигзаглар ясап килгән. Фура йөртүче бәрелештән тайпылырга тырышкан. Бәрелеш нәтиҗәсендә 2 транспорт та кюветка төшеп капланган.

Йөк машинасы 8 пассажир һәм йөртүче булган микроавтобусны үз астында изгән. Барысы да шунда урында үлгән. Арада балалар юк. «Калуга-24» телеканалы мәгълүматларына караганда, микроавтобус эченнән коткаручылар чемоданнар, әйберләр тутырган бауллар, төргәге белән документлар һәм Прибалтика илләре сим-карталары тапканнар.

Оператив видео кадрларыннан күренгәнчә, микроавтобустан берни дә калмаган, ә йөк машинасына зур зыян килгән.

Үлүчеләрнең мәетләрен, транспортны кисеп, 3 сәгатьтән артык алганнар.

Фураны йөртүчегә килгәндә, ул исән. ЮХИДИ мәгълүматларына караганда, айнык булган. tula.aif.ru мәгълүматлары буенча, ул алып барган цистернада бетон өчен махсус катнашма булган булырга мөмкин. Аны катнашма һәм конструкцияләрнең сыйфатын яхшырту, шулай ук, материалның үзбәясен киметү өчен кулланалар.

Эш ачылган

Тикшерү турында хәбәрне төбәк прокуратурасы авариядән соң 2 сәгатькә якын вакыт үтүгә үз Телеграм каналында хәбәр итте, ә 3 минуттан төгәлрәк хәбәр килде: «йөртүченең юл хәрәкәте кагыйдәләрен бозуы яки транспортны эксплуатацияләүдә саксызлык аркасында ике я күбрәк кешенең үлеменә китерүе» маддәсе буенча җинаять эше ачылган.

Тикшерү барышы һәм нәтиҗәләре өлкә прокуратурасы контроленә куелган.

Һәлакәт булган урында хокук саклау органнарының эшен өлкә прокуратурасы беренче урынбасары Михаил Можаев, Тула өлкәсе Ленин районы прокуроры Дмитрий Сазанов координацияли. Прокурорлар кышкы юлда куркынычсыз хәрәкәтне бәяләячәк. Нигез бар дип табылса, прокурордан җавап реакциясе булачак.

Урынга, шулай ук, Тула тикшерүчеләре һәм процесс тикшерүе кысаларында криминалистлар да чыкты. Оператив-тикшерү төркеме эшен координацияләү өчен, урынга идарә җитәкчесе урынбасары Никита Севостьянов та килгән.